Qazaqstan men Ózbekstan arasynda áýe reısteri artady
ASTANA. KAZINFORM - Kólik mınıstri Marat Qarabaev Ózbekstan Respýblıkasynyń kólik salasyna jaýapty mınıstri Ilhom Mahkamovpen kezdesti.
Kezdesý barysynda yntymaqtastyqtyń negizgi baǵyttary jáne áriptestikti odan ári nyǵaıtý múmkindikteri, sondaı-aq halyqaralyq kólik dálizderin, temirjol jáne avtomobıl kóligin damytý, kólik ınfraqurylymyn salý salalaryndaǵy birlesken jobalardy iske asyrý máselesi talqylandy.
Atap aıtqanda, búgingi tańda Darbaza men Maqtaaral arasyndaǵy jańa temirjol jelisiniń qurylysy boıynsha jumys júrip jatyr.
Jobany iske asyrý eki el arasyndaǵy júk ótkizý qabiletin taǵy 10 mln tonnaǵa arttyrýǵa múmkindik beredi dep josparlanyp otyr.
Avtotasymal salasyndaǵy yntymaqtastyq týraly aıta kele, elder arasyndaǵy avtotasymaldar Úkimetaralyq kelisim negizinde júzege asatynyn atap ótken jón.
«Ótken jyly avtokólikpen eksporttyq-ımporttyq tasymaldaý kólemi 6 paıyzǵa ulǵaıyp, 1,8 mln tonnany qurady. Jalpy avtotasymaldaý salasyndaǵy yntymaqtastyqty damytýda oń serpin baıqalady», — dep atap ótti Marat Qarabaev.
Azamattyq avıatsııa kólik-logıstıkalyq habtyń negizgi qozǵaýshy kúshi. Qazirgi ýaqytta Qazaqstan men Ózbekstan qalalary arasynda aptasyna 37 reıs oryndalady.
Ótken jyly Tashkentte Qazaqstan men Ózbekstannyń avıatsııalyq bılik organdary arasynda kelissózder ótken bolatyn.
Kelissóz Barysynda taraptar reıster sanyn odan ári ulǵaıtý jáne ushý geografııasyn keńeıtý máselelerin talqylap, ruqsat etilgen reıs sanyn Astana — Tashkent baǵyttary boıynsha aptasyna 12 reısten 36 reıske deıin, Almaty-Tashkent baǵyttary boıynsha aptasyna 20 reısten 36 reıske deıin, al qalǵan marshrýttarda aptasyna 4 reıske deıin ulǵaıtýǵa ýaǵdalasty.
«Termez-Mazarı-Sharıf-Kabýl-Peshavar» temirjolynyń qurylysyna keletin bolsaq, qazaqstandyq tarap Ózbekstannyń bul bastamasyn qoldaıdy.
«Jobany iske asyrý Ortalyq Azııa elderi úshin óńirlik qatynas pen saýdany damytýǵa yqpal etetinine senimdimin, óıtkeni Ońtústik Azııa óńiriniń iri teńiz porttaryna qoljetimdilik ashylady», -dedi vedomstvo basshysy.
Tutastaı alǵanda eki el arasyndaǵy júkterdi avtokólikpen tasymaldaý jáne tranzıtteý úkimetaralyq kelisimge sáıkes ruqsatsyz negizde júzege asyrylady.
Kezdesý qorytyndysy boıynsha taraptar 2024-2025 jyldar aralyǵynda Qazaqstan men Ózbekstan arasyndaǵy kólik jáne logıstıka salasyndaǵy strategııalyq yntymaqtastyqty damytý jónindegi Jol kartasyna qol qoıdy.
Kezdesýdi qorytyndylaı kele taraptar kún tártibindegi ózekti máseleler boıynsha pikir almasty.
