Qazaqstan men Ózbekstan Aral teńiziniń qurǵaǵan tabanynda jasyl jelek otyrǵyzý jumysyn talqylady
ASTANA.KAZINFORM - Búgin Qazaqstan Respýblıkasynyń Ekologııa jáne tabıǵı resýrstar mınıstri E.Nysanbaev Ózbekstan Respýblıkasy Prezıdentiniń ekologııa máseleleri jónindegi keńesshisi - Ekologııa jáne klımattyń ózgerýi jónindegi ulttyq komıtettiń tóraǵasy A.Abdýhakımovpen onlaın kezdesý ótkizdi.
Kezdesý barysynda taraptar osy jyldyń 22-24 sáýirinde ótetin Astana qalasyndaǵy Óńirlik ekologııalyq sammıtke qatysý máselelerin talqylady. Orman sharýashylyǵyn basqarý máselelerin talqylaý da mańyzdy boldy.
Orman resýrstaryn turaqty basqarý salasyndaǵy tájirıbe almasýǵa, birlesken jobalar men baǵdarlamalardy iske asyrý múmkindigine, ǵylymı-tehnıkalyq ózara is-qımyldy keńeıtýge, Aral teńiziniń qurǵaǵan tabanynda jasyl jelekterdi otyrǵyzý jumystaryna tolyǵyraq toqtaldy.
Taraptar atmosferalyq aýanyń sapasyn arttyrý, atap aıtqanda aýa sapasy boıynsha sońǵy derektermen almasý, birlesken zertteýler men jobalardyń múmkindigi máselelerin qozǵady.
Kezdesý qorytyndysy boıynsha taraptar kún tártibindegi máseleler boıynsha yntymaqtastyqty odan ári nyǵaıtýǵa daıyn ekenin bildirdi.
Aıta keteıik, 22-24 sáýir aralyǵynda Astanada «RES 2026 EXPO» halyqaralyq jasyl jáne turaqty tehnologııalar kórmesi ótedi. Aýqymdy is-shara Ortalyq Azııa elderiniń qatysýymen ótetin – Óńirlik ekonomıkalyq sammıt 2026 aıasynda uıymdastyrylyp, aımaqtyń turaqty damý salasyndaǵy negizgi dıalog alańyna aınalmaq.
