Qazaqstan men Ózbekstan Aral tabanyna sekseýil otyrǵyzý boıynsha birlesken joba ázirlemek

TAShKENT. KAZINFORM – Resmı Astana men Tashkent Aral teńiziniń qazaq-ózbek shekarasy arqyly ótetin aýmaǵyna sekseýil otyrǵyzý boıynsha birlesken jobany iske asyrmaq.

Bul týraly Kazinform agenttiginiń menshikti tilshisine suhbat bergen Qaraqalpaqstannyń Ekologııa mınıstri Leılı Seıtova málim etti.

- Bizge qazaqstandyq áriptesterimiz kelip, tájirıbe almasady. Olar Qaraqalpaqstanda atqarylǵan jumystyń nátıjesin kórdi. Sekseýildi otyrǵyzý tásilderin jetildirý boıynsha Qazaqstanmen birlesken jobalar bar. Araldyń jartysy kórshi elde, qalǵany Ózbekstan aýmaǵynda ornalasqan. Tıisinshe, bizge shekara mańyna sekseýil otyrǵyzý jobasyn Qazaqstanmen birlesip ázirlep, keıin júze asyrý tapsyrmasy júkteldi, - dedi Leılı Seıtova Kazinform tilshisiniń saýalyna jaýap bere otyryp.

Spıker atap ótkendeı, Aral teńizin qaıta qalpyna keltirý múmkin bolmasa da, onyń teris saldaryn azaıtyp, qalǵan ekojúıeni saqtap qalý mańyzdy.

- Aral teńizin qaıta toltyra almaımyz. Bul dáleldi talap etpeıtin shyndyq. Degenmen bizdiń mindet – qalǵan kólderdi saqtap qalý. Ol úshin aımaq elderi arasyndaǵy yntymaqtastyqty nyǵaıta túsý mańyzdy. Sý dıplomatııasyn damytý arqyly máseleniń sheshimin tabýǵa bolady, - dep málim etti Leılı Seıtova.

Osy rette Qaraqalpaqstannyń Ekologııa mınıstri Araldyń qurǵaǵan tabanyn jasyl jelekke aınaldyrý boıynsha atqarylyp jatqan isterdiń nátıje bere bastaǵanyna toqtaldy.

- Ózbekstan aýmaǵyndaǵy Aral tabanynyń 2 mln gektaryna sekseýil otyrǵyzyldy. Bul 2018 jyly bastalǵan joba. Atqarylǵan jumys jaqsy nátıje bere bastady. Alǵashqy ýaqytta sekseýil jerden kóteriletin 15-18% tuz ben shańdy ustap qalady degen boljam jasalǵan. Degenmen nátıje aldyn-ala esepteýden asyp tústi. ıAǵnı, sekseýil 35-40%-ǵa jýyq shań men sordyń kókke kóterilýin tejep jatyr, - dep qorytyndylady Leılı Seıtova.

Eske salaıyq, taıaýda QR Ekologııa jáne tabıǵı resýrstar mınıstri Erlan Nysanbaev Aral teńiziniń qurǵaǵan túbine sekseýil otyrǵyzý jumystaryna túsinik berdi.

Sonymen qatar bıyl Araldyń qurǵaǵan ultanyndaǵy 15 myń gektar jerge sekseýil egiledi.