Qazaqstan men Ózbekstan Aqtaý teńiz portynda birlesken jobalardy iske asyrmaq

TAShKENT. KAZINFORM — Ózbekstandyq dıplomattar Qazaqstanda Aqtaý teńiz portynyń basshylyǵymen kezdesip, jobalardy birlesip iske asyrý múmkindigin talqylady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstannyń Syrtqy ister mınıstrligine qarasty «Dunyo» agenttiginiń málimetinshe, kezdesý barysynda taraptar Aqtaý teńiz portynyń jaı-kúıin, ózbek kásipkerleriniń ónimin atalǵan port arqyly ózge naryqqa shyǵarý perspektıvasyn sóz etti.

«Aqtaý teńiz saýda porty» ulttyq kompanııasynyń basqarma tóraǵasy Abaı Túrikpenbaev atap ótkendeı, búginde bul port Transkaspıı halyqaralyq kólik dáliziniń mańyzdy quramdas bóligi sanalady. Bıyl Aqtaý teńiz porty tranzıt kólemin 5 mln tonnadan asyrýdy josparlap otyr. Keıin porttyń akvatorııasyn keńeıtý boıynsha jumystar qolǵa alynady, — delingen «Dunyo» aqparat agenttiginiń habarlamasynda.

Kezdesý qorytyndysy boıynsha taraptar ekijaqty yntymaqtastyq jáne birlesken jobalardy iske asyrýǵa baǵyttalǵan kelisimderge qol qoıdy.