Qazaqstan men Ózbekstan adam quqyǵyn qorǵaý salasyndaǵy yntymaqtastyqty nyǵaıtpaq
TAShKENT. KAZINFORM – Tashkentte QR Syrtqy ister mınıstrliginiń Erekshe tapsyrmalar jónindegi elshisi Alýa Nádirqulova men Ózbekstannyń Adam quqyqtary jónindegi ulttyq ortalyǵynyń dırektory Akmal Saıdov kezdesý ótkizdi, dep habarlaıdy Kazinform agenttiginiń Tashkenttegi menshikti tilshisi.
Áýeli Akmal Saıdov qazaqstandyq delegatsııany konstıtýtsııalyq reformanyń tabysty júzege asýymen quttyqtady. Atap aıtqanda, ol memlekettik basqarý modelin jetildirý, bir palataly Parlamentke kóshý jáne jańa Konstıtýtsııada basymdyq berilgen adam quqyqtaryn qorǵaý tetikterin joǵary baǵalady.
Kezdesýde taraptar Qazaqstan men Ózbekstan adam quqyqtary salasyndaǵy yqpaldastyqty ilgeriletip kele jatqanyn atap ótti. Bul rette jıynǵa qatysqan sarapshylar baılanystardy odan ári tereńdetý múmkindikterin talqylap, birqatar usynys aıtty.
Taraptar áıelder quqyǵyn qorǵaýǵa baǵyttalǵan forýmdar men trenıngter uıymdastyrýǵa ýaǵdalasty. Sondaı-aq, Ortalyq Azııadaǵy adam quqyqtary salasyndaǵy yntymaqtastyqty jańa deńgeıge kóterý úshin ortaq is-qımyldar josparyn ázirleý bastamasyn zerdeledi.
Eske salaıyq, taıaýda Ózbekstanda 161 qýǵyn-súrgin qurbany aqtaldy.
Qosa ketsek, buǵan deıin Toqaev pen Mırzıeevtiń beıresmı kezdesýi qazaq-ózbek baılanystaryna tyń serpin bergenin jazyp edik.
