Qazaqstan men Ózbekstan $1,8 mlrd-tan asatyn 80 birlesken jobany iske asyryp jatyr
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov pen Ózbekstan Respýblıkasynyń Premer-mınıstri Abdýlla Arıpov Aqtaýda Ekijaqty yntymaqtastyq jónindegi birlesken úkimetaralyq komıssııanyń 23-shi otyrysyn ótkizdi. Bul týraly Úkimettiń baspasóz qyzmeti habarlady.
Shaǵyn quramdaǵy kezdesýde joǵary deńgeıde qol jetkizilgen ýaǵdalastyqtardyń júzege asyrylý barysy qaralyp, aldaǵy jumystyń basym baǵyttary talqylandy.
— Memleket basshylary Qasym-Jomart Kemeluly Toqaev pen Shavkat Mıromonovıch Mırzıeevtiń birlesken kúsh-jigeriniń arqasynda bizdiń kópqyrly baılanystarymyz qarqyndy damyp keledi jáne búkil Ortalyq Azııa óńirindegi ózara is-qımyldyń tabysty úlgisine aınaldy. Ótken jyldyń qarasha aıynda Qazaqstan Respýblıkasy Prezıdentiniń Ózbekstanǵa memlekettik saparynyń qorytyndysy qazaq-ózbek seriktestiginiń senim rýhyndaǵy sıpatyn taǵy bir aıqyndap berdi, — dep atap ótti Oljas Bektenov.
— Bıyl memleketterimizdiń basshylary Buhara, Astana jáne Túrkistan qalalarynda ótken kezdesýleri aıasynda eki eldiń úkimetterine yntymaqtastyqty keńeıtý jóninde naqty mindetter júktedi. Atalǵan tapsyrmalardy oryndaý maqsatynda barlyq qajetti sharalardy qabyldaýǵa daıynbyz. Bizdiń búgingi kelissózder saýda, ınvestıtsııa, ónerkásip, kólik, óńiraralyq jáne mádenı-gýmanıtarlyq yntymaqtastyqty odan ári damytýǵa yqpal etetinine senimdimin, — dep atap ótti Abdýlla Arıpov.
2025 jyldyń qorytyndysy boıynsha ekijaqty saýda kólemi $4,8 mlrd-ty qurady. 2026 jyldyń alǵashqy bes aıynda Qazaqstan men Ózbekstan arasyndaǵy taýar aınalymy 37%-ǵa artyp, $2,3 mlrd-qa jetti. Qazaqstannyń eksporttyq áleýeti metallýrgııa, mashına jasaý, munaı hımııasy, hımııa ónerkásibi, farmatsevtıka, kólik quraldary men qurylys materıaldary óndirý salalarynda aıqyn baıqalady. Oljas Bektenov ınvestıtsııalar jáne saýda salasyndaǵy jalpy quny $7,8 mlrd quraıtyn jol kartasyn sapaly júzege asyrýdyń mańyzdylyǵyn atap ótti. Oǵan engizilgen jobalar boıynsha birlesken jumys taýar aınalymyn ártaraptandyrý, ózara jetkizilimderdi keńeıtý jáne jańa ınvestıtsııalar tartýdy qamtamasyz etedi.
Yntymaqtastyqtyń negizgi baǵyttarynyń biri — ónerkásiptik kooperatsııa. Qazirgi tańda Qazaqstan men Ózbekstan jalpy quny $1,8 mlrd-tan asatyn 80 birlesken jobany júzege asyrý boıynsha jumys júrgizýde. Quny $227 mln-dy quraıtyn 15 joba iske qosylyp, 5 myńǵa jýyq jumys orny ashyldy. Búginde jalpy somasy $102 mln bolatyn 6 joba belsendi júzege asyrý kezeńinde. Sonymen qatar quny $1,5 mlrd-ty quraıtyn keleshegi zor 59 bastamany júzege asyrý máselesi pysyqtalýda.
Kólik qatynasy jáne logıstıkalyq dálizderdi damytý máseleleri qaraldy. 2025 jyldyń qorytyndysy boıynsha Qazaqstan men Ózbekstan arasyndaǵy temirjol tasymalynyń kólemi 16%-ǵa ósip, 32,3 mln tonnany qurady. Tasymaldardy odan ári ulǵaıtý úshin temirjol dálizderiniń ótkizý qabiletin 35 mln tonnadan 60 mln tonnaǵa deıin arttyrý jónindegi birlesken is-sharalar jospary ázirlendi. QR Premer-mınıstri Oljas Bektenov Ortalyq Azııa elderimen kólik baılanystaryn keńeıtý úshin temirjol ınfraqurylymyn odan ári damytýdyń mańyzdylyǵyn atap ótti. Osyǵan baılanysty irgeles temirjol ýchaskelerin jańǵyrtý jáne qosymsha ótkizý pýnktterin ashý múmkindigin qarastyrý usynyldy.
Qazaqstandyq teńiz ınfraqurylymyn paıdalanýda oń dınamıka baıqalady. Avtomobıl tasymaly salasyndaǵy yntymaqtastyq damýda.E-Permit júıesinde sheteldik ruqsat blankilerimen elektrondyq almasý tetiginiń engizilýi tórt jyl ishinde olardyń sanyn on eseden astam arttyrýǵa jáne memlekettik shekaradan ótý ýaqytyn 9 saǵattan 30 mınýtqa deıin qysqartýǵa múmkindik berdi.
Sý sharýashylyǵy salasynda ózara túsinistik pen eki eldiń múddelerin esepke alý negizinde yntymaqtastyqty damytýǵa daıyn ekendigi rastaldy.
Taraptar sondaı-aq mádenı-gýmanıtarlyq baılanystardy damytýdyń mańyzdylyǵyn atap ótti. Búgingi tańda Qazaqstan men Ózbekstannyń tarıhı-mádenı nysandaryn ıÝNESKO-nyń Búkilálemdik mura tizimine engizý úshin «Uly Jibek joly: Ferǵana–Syrdarııa dálizi» transulttyq nomınatsııasyna qosý boıynsha birlesken jumys jalǵasýda.
Birlesken úkimetaralyq komıssııanyń keńeıtilgen quramdaǵy otyrysynda naqty jobalardy júzege asyrýǵa jáne saýda-ekonomıkalyq yntymaqtastyqty keńeıtý úshin qabyldanatyn sharalardyń tıimdiligin odan ári arttyrýǵa nazar aýdaryldy.
Qazaqstan tarapynan saýda jáne ıntegratsııa mınıstri Arman Shaqqalıev, kólik mınıstri Nurlan Saýranbaev, sý resýrstary jáne ırrıgatsııa vıtse-mınıstri Talǵat Momyshev baıandama jasady. Ózbekstan tarapynan ınvestıtsııalar, ónerkásip jáne saýda mınıstri Lazız Kýdratov, kólik mınıstri Ilhom Mahkamov jáne sý sharýashylyǵy mınıstriniń birinshi orynbasary Zokır Ishpýlatov tyńdaldy.
Talqylaý qorytyndysy boıynsha taraptar ónerkásipte, kólik-tranzıt salasynda jáne ekonomıkanyń basqa da salalarynda yntymaqtastyqty jandandyrýǵa kelisti.
Jıyn sońynda qos memlekettiń premer-mınıstrleri Ekijaqty yntymaqtastyq jónindegi birlesken úkimetaralyq komıssııanyń 23-shi otyrysynyń hattamasyna qol qoıdy.
