Qazaqstan men Ortalyq Azııada heıboldy damytý máselesi talqylandy
ASTANA. KAZINFORM - Qazaqstanda heıboldy damytý jáne ony halyqaralyq jarystardyń baǵdarlamasyna engizý múmkindikteri Qazaqstan Ulttyq Olımpıadalyq komıteti, Qazaqstannyń bılıard sporty federatsııasy jáne Qytaıdyń JOY Billiards kompanııasy ókilderiniń kezdesýinde talqylandy.
Ulttyq olımpıadalyq komıtettiń baspasóz qyzmetiniń habarlaýynsha, taraptar bul sport túrin aldymen Azııa deńgeıindegi jarystarǵa engizý múmkindikterin qarastyrýdy usyndy.
Kezdesýge Qazaqstan UOK bas hatshysy Álimjan Aqaev, komıtettiń bas dırektory Nurlan Nógerbek, JOY Billiards kompanııasynyń negizin qalaýshy ári basshysy Tsıao ıÝansıýı, kompanııanyń bas menedjeri Chjan Sıaopın jáne Qazaqstannyń bılıard sporty federatsııasynyń prezıdenti Ańsary Qaraneev qatysty.
Taraptar heıboldy 2030 jyly Qatardyń Doha qalasynda ótetin Azııa oıyndary men 2032 jyly Aýstralııanyń Brısben qalasynda uıymdastyrylatyn Olımpıada oıyndarynyń baǵdarlamasyna engizý múmkindikterine erekshe nazar aýdardy.
Qytaılyq segizdik degen atpen de belgili heıbol – bılıardtyń bir túri. Qazirgi ýaqytta bul sport túri halyqaralyq deńgeıde qarqyndy damyp keledi. 2025 jyly heıbol Qytaıdyń Chendý qalasynda ótken Dúnıejúzilik oıyndardyń baǵdarlamasyna alǵash ret engizildi.
JOY Billiards ókilderi heıboldy túrli elderde keńinen nasıhattaý jáne onyń geografııalyq aýqymyn keńeıtý baǵytynda atqarylyp jatqan jumystar týraly baıandady. Qazaqstandyq tarap bul sport túrin halyqaralyq deńgeıde damytý úshin kezeń-kezeńimen áreket etý qajettigin atap ótti. Alǵashqy kezekte ony Azııa Olımpıadalyq keńesiniń uıymdastyrýymen ótetin jarystardyń baǵdarlamasyna engizý múmkindikterin qarastyrý usynyldy.
Yntymaqtastyqtyń yqtımal baǵyttarynyń biri retinde Azııanyń zııatkerlik sport túrleri qaýymdastyǵymen (AMSA) baılanys ornatý máselesi qarastyryldy. Sondaı-aq taraptar 2027 jyly Kýveıtte ótetin kıbersport jáne zııatkerlik sport túrleri boıynsha Azııa oıyndary aıasynda heıboldy damytý múmkindikterin talqylady.
Budan bólek, Qazaqstanda heıboldy damytý máselesine de nazar aýdaryldy. Ulttyq federatsııa ókilderi sport túrin keńinen nasıhattaý, qajetti sport ınfraqurylymyn damytý jáne jattyǵýlar men jarystar ótkizýge qolaıly jaǵdaı jasaý baǵytyndaǵy jumystar týraly málimet berdi.
Kezdesý sońynda taraptar Qazaqstan men Ortalyq Azııada heıboldy damytý, sondaı-aq ony halyqaralyq deńgeıde keńinen nasıhattaý baǵytyndaǵy yntymaqtastyqty jalǵastyrýǵa nıetti ekenin bildirdi.
