Qazaqstan men Ortalyq Azııa arasyndaǵy taýar aınalymy 7,6 mlrd dollarǵa jetti
ASTANA. KAZINFORM – Qazaqstan men Ortalyq Azııa elderi arasyndaǵy saýdada joǵary qosylǵan quny bar ónimderdiń úlesi artyp keledi. Saýdanyń damýy týraly Saýda jáne ıntegratsııa mınıstri Arman Shaqqalıev aıtyp berdi.
- Ortalyq Azııa – eleýli áleýetke ıe. Óńir halqynyń jıyntyq sany 81 mıllıonnan asady jáne turaqty ósip otyr. Halyqaralyq kórmege Ortalyq Azııa elderi, Kaspıı jaǵalaýy elderi, Qytaı, Reseı jáne Eýropalyq Odaq elderi qatysyp otyr. Bul Qazaqstan men jalpy óńirge degen senim. Qazaqstan óńirde tranzıttik jáne saýda toraby. 2024 jyly Qazaqstan men Ortalyq Azııa elderi arasyndaǵy taýar aınalymy 7,6 mlrd AQSh dollaryna jetti, - dedi Arman Shaqqalıev elordada ótip jatqan EXPO Goods Central Asia alǵashqy halyqaralyq forým-kórmesinde.
Mınıstrdiń málimdeýinshe, Qazaqstan men Ortalyq Azııa elderi arasyndaǵy saýdada joǵary qosylǵan quny bar ónimderdiń úlesi artyp keledi.
- Bul ózara saýdanyń jáne óńirdiń neǵurlym turaqty damýynyń kepili. Biz zamanaýı saýda ınfraqurylymyn damytýǵa, elektrondy saýdany damytýǵa jáne qazaqstandyq bıznestiń halyqaralyq naryqqa shyǵý aıasyn keńeıtýge erekshe nazar aýdaramyz. Memleket pen bıznes qoǵamdastyǵy ınnovatsııa, tsıfrlandyrý jáne turaqty eko júıeni qurý úshin birlesip jumys istep jatyr, - deıdi ol.
Aıta keteıik, elordada EXPO Goods Central Asia atty 159 otandyq jáne halyqaralyq saýda markasynyń qatysýymen kórme jáne forým ótip jatyr.