Otandyq JOO-lar ChatGPT Edu bilim berý platformasyna qosylady
ASTANA. KAZINFORM – Vashıngton qalasynda ótken C5+1 bıznes-forýmy aıasynda QR Ǵylym jáne joǵary bilim mınıstrligi, Jasandy ıntellekt jáne tsıfrlyq damý mınıstrligi, OpenAI, Inc. jáne Freedom Holding Corp. arasynda ózara túsinistik týraly memorandýmǵa qol qoıyldy. Bul týraly Ǵylym jáne joǵary bilim mınıstrligi habarlady.
Qujattyń maqsaty – bilim berý, tsıfrlyq transformatsııa jáne jasandy ıntellekt tehnologııalaryn Qazaqstannyń joǵary, tehnıkalyq jáne kásibı bilim berý júıesine engizý salasyndaǵy yntymaqtastyqty damytý.
Kelisimniń basty maqsaty – jasandy ıntellekt negizindegi bilim berý quraldaryn keń kólemde engizý úshin jaǵdaı jasaý, stýdentterdiń, oqytýshylar men basqarýshy kadrlardyń tsıfrlyq jáne JI daǵdylaryn damytý, sondaı-aq zamanaýı tehnologııalar negizinde kóptildi jáne qazaqtildi kontent qalyptastyrý.
Yntymaqtastyq aıasynda eldegi joǵary oqý oryndary men kolledjderdi OpenAI kompanııasynyń ChatGPT Edu bilim berý platformasyna qosý boıynsha pılottyq jobany iske qosý qarastyrylǵan. Platformaǵa oqytýshylar, stýdentter jáne ákimshilik qyzmetkerler qol jetkize alady. Bul JI tehnologııalardy oqý, ǵylymı jáne ákimshilik qyzmette tıimdi paıdalanýǵa múmkindik beredi.
Ǵylym jáne joǵary bilim mınıstrligi joǵary oqý oryndarynyń qatysýyn úılestiredi jáne JI quraldaryn bilim berý úderisterine engizý jumystaryn tsıfrlandyrý jáne joǵary bilim berý salasyndaǵy ulttyq saıasatqa sáıkestendire otyryp júzege asyrady. Al Jasandy ıntellekt jáne tsıfrlyq damý mınıstrligi orta, tehnıkalyq jáne kásibı bilim berý uıymdarymen ózara is-qımyldy qamtamasyz etip, jobany AI-Sana baǵdarlamasy aıasynda úılestiretin bolady.
OpenAI kompanııasy tehnologııalyq áriptes retinde ChatGPT Edu lıtsenzııalaryn jáne ádistemelik qoldaý usynsa, Freedom Holding Corp. lıtsenzııalardy satyp alýǵa qarjylyq qoldaý kórsetip, bastamanyń uıymdastyrýshylyq jaǵyn qamtamasyz etedi.
QR Ǵylym jáne joǵary bilim mınıstri Saıasat Nurbek OpenAI kompanııasymen jasalǵan kelisimniń elimizdegi tsıfrlyq bilim berý men ınnovatsııalardy damytýdaǵy mańyzdylyǵyn atap ótti.
– OpenAI kompanııasymen kelisimge qol qoıý – Qazaqstannyń joǵary bilim júıesin túrlendirý jolyndaǵy jańa múmkindik. ChatGPT Education ıntellektýaldy bilim berý platformasyn engizý oqý sapasyn arttyryp, zamanaýı tsıfrlyq quraldarǵa qoljetimdilikti keńeıtedi jáne Qazaqstannyń Ortalyq Azııadaǵy aımaqtyq ǵylymı-bilim berý jáne ınnovatsııalyq ortalyq retindegi ornyn nyǵaıtady, - dedi mınıstr.
QR Jasandy ıntellekt jáne tsıfrlyq damý mınıstri bul áriptestiktiń el úshin mańyzyn atap ótti.
– OpenAI jáne Freedom Holding Corp. kompanııalarymen yntymaqtastyq – ulttyq AI-ekojúıesin damytýdaǵy mańyzdy qadam. Biz bilim berý salasynda jasandy ıntellektini tıimdi paıdalaný arqyly Qazaqstannyń tsıfrlyq dáýirdegi básekege qabilettiligin arttyrýǵa jaǵdaı jasap otyrmyz, - dedi mınıstr.
Memorandýmdy iske asyrý zamanaýı, tehnologııalyq bilim berý júıesin qalyptastyrý jolyndaǵy mańyzdy qadam bolmaq.
Aıta keteıik, Parlament jasandy ıntellekt týraly zań qabyldady.