Qazaqstan men Ońtústik Sýdan dıplomatııalyq qatynastar ornatty
ASTANA. KAZINFORM — Qazaqstannyń BUU janyndaǵy turaqty ókili Qaırat Ýmarov pen Ońtústik Sýdannyń BUU janyndaǵy turaqty ókili Sesılııa Adýt Manok Adeng eki el arasyndaǵy dıplomatııalyq qatynastardy ornatý týraly birlesken kommıýnıkege qol qoıdy, dep habarlaıdy SІM.
Qazaqstan Ońtústik Sýdan Respýblıkasyn 2011 jylǵy 15 shildede onyń táýelsizdigin jarııalaǵannan keıin resmı túrde moıyndady.
— Qol qoıylǵan qujat eki el arasyndaǵy qatynastar tarıhyndaǵy jańa bettiń bastalǵanyn bildiredi. Qazaqstan men Ońtústik Sýdan halyqaralyq quqyqtyń, BUU Jarǵysynyń qaǵıdattaryna, memlekettik egemendik pen aýmaqtyq tutastyqty qurmetteýge beıildiligin, sondaı-aq ekijaqty negizde jáne kópjaqty formattarda ózara tıimdi yntymaqtastyqty damytý nıetin rastady, — delingen habarlamada.
Taraptar Qazaqstannyń Afrıka memleketterimen ózara is-qımylynyń ósip kele jatqan serpinin atap ótip, saýda-ekonomıkalyq baılanystardy damytýǵa qyzyǵýshylyq bildirdi. Teńizge shyǵa almaıtyn elder toby (LLDC) sheńberindegi yntymaqtastyq perspektıvasy jáne Afrıka naryqtarymen ózara is-qımyly jasaý úshin Transkaspıı halyqaralyq kólik baǵytyn paıdalaný áleýeti atalyp ótti.
Kópjaqty kún tártibin talqylaı otyryp, taraptar jahandyq qaýipsizdiktiń negizgi máseleleri boıynsha ustanymdarynyń jaqyndyǵyn rastady jáne BUU alańyndaǵy yntymaqtastyqty odan ári nyǵaıtýdy qoldady. Taraptar BUU-nyń Ońtústik Sýdan mıssııasyna (UNMISS) qatysý máselelerin qosa alǵanda, bitimgershilik máseleleri boıynsha pikir almasty jáne osy eldegi jaǵdaıdy retteý úshin turaqtylyq pen dıalogtyń mańyzdylyǵyn atap ótti.
Aıta keteıik, Ońtústik Sýdan — Qazaqstan dıplomatııalyq qatynastar ornatqan
191-shi memleket sanalady. Bul elimizdiń halyqaralyq belsendiligi men seriktestik baılanystarynyń dáıekti keńeıýin kórsetedi.
Budan buryn BUU Sýdan halqynyń úshten eki bóligi gýmanıtarlyq kómekke zárý ekeni aıtyldy.