Qazaqstan men Ońtústik Koreıa kreatıvti ındýstrııany birge damytady
ASTANA.KAZINFORM - Elimiz Ońtústik Koreıamen kreatıvti ındýstrııa salasyndaǵy birlesken jumysty jandandyrýǵa den qoıdy. Bul týraly Mádenıet jáne aqparat mınıstrligi habarlady.
Seýl qalasynda qazaqstandyq delegatsııa Koreıanyń memlekettik organdary men jetekshi kompanııalarynyń ókilderimen birqatar kezdesý ótkizip, ekijaqty áriptestikti damytý, tájirıbe almasý jáne ortaq jobalardy júzege asyrý máselelerin pysyqtady.
Kezdesýlerdiń biri «Kreatıvti ındýstrııalardy damytý qory» korporatıvtik qory Basqarýshy keńesiniń tóraǵasy Erlan Kanalımov pen Ońtústik Koreıanyń Mádenıet, sport jáne týrızm vıtse-mınıstri Kım De Henniń qatysýymen ótti. Taraptar kreatıvti ekonomıkany damytýdaǵy memlekettik saıasat, shyǵarmashylyq kásipkerlikti qoldaý tetikteri jáne ulttyq kontentti halyqaralyq naryqqa ilgeriletý baǵytyndaǵy tájirıbelerin ortaǵa saldy.
Jıyn qorytyndysynda Qor men Koreıa Respýblıkasynyń kreatıvti kontentti damytý agenttigi (KOCCA) yntymaqtastyq týraly memorandýmǵa qol qoıdy. Qujat kıno, mýzyka jáne kreatıvti ekonomıkanyń ózge de baǵyttarynda birlesken jobalardy júzege asyrýdy, bilim berý baǵdarlamalaryn uıymdastyrýdy, tájirıbe almasýdy jáne ortaq saraptamalyq zertteýler júrgizýdi kózdeıdi. Sapar barysynda qazaqstandyq delegatsııa Azııadaǵy iri medıakompanııalardyń biri – MBC korporatsııasy men álemdik mýzyka ındýstrııasyndaǵy jetekshi kompanııalardyń biri – HYBE basshylyǵymen de kezdesti.
Kezdesý barysynda kontent daıyndaý, zııatkerlik menshik nysandaryn kommertsııalandyrý, jasandy ıntellekt tehnologııalaryn paıdalaný, tsıfrlyq platformalardy damytý jáne kreatıvti ónimdi halyqaralyq naryqqa ilgeriletý máseleleri sóz boldy.
Kelisimder Qazaqstan men Ońtústik Koreıa arasyndaǵy kreatıvti ındýstrııa salasyndaǵy áriptestikti odan ári nyǵaıtýǵa jol ashyp, elimizdiń avtorlary men shyǵarmashylyq kásip ıeleri úshin halyqaralyq múmkindikterdi keńeıtýge yqpal etpek. Sonymen qatar qazaqstandyq kreatıvti ónimniń álemdik naryqtaǵy áleýetin arttyrýǵa da serpin beredi.
Aıta keteıik, Qazaqstanda kreatıvti ındýstrııada 156,7 myń adam jumys isteıdi.
Kreatıvti ındýstrııalardy damytý qory talanttardy qoldap, jańa jobalardy iske asyrýǵa jáne otandyq ónimdi halyqaralyq naryqqa shyǵarýǵa basymdyq berip keledi.
