Qazaqstan men Ońtústik Koreıa týrızm jáne sport salasyndaǵy qarym-qatynasty nyǵaıtpaq
Týrızm jáne sport mınıstri Ermek Marjyqpaev Koreıa Respýblıkasynyń Qazaqstandaǵy Tótenshe jáne Ókiletti Elshisi Chjo Te-Ikpen kezdesti, dep habarlaıdy Kazinform.
QR Týrızm jáne Sport mınıstrliginiń baspasóz qyzmeti málim etkendeı, kezdesý Memleket basshysynyń Týrızm jáne sport mınıstrligi, Ulttyq Olımpıada komıteti jáne sport federatsııalary birlese jumys isteý kerek degen tapsyrmasyn oryndaý maqsatynda qurylǵan Kanvondaǵy IV qysqy Jasóspirimder Olımpıadasyna jáne Parıjdegi jazǵy Olımpıada men Paralımpıadaǵa daıyndyq jónindegi shtabtyń keńsesinde ótti.
Shtabtyń negizgi jumysy – sportshylardyń aldaǵy jarystarǵa sapaly daıyndyǵyn qamtamasyz etý.
Eki eldiń sportshylary túrli deńgeıdegi jarystarǵa belsene qatysyp, birlesken oqý-jattyǵý jıyndaryn ótkizip keledi. Máselen, 2023 jyldyń shilde aıynda bokstan áıelder quramasy Koreıanyń Poren qalasynda oqý-jattyǵý jıynyn ótkizdi. Sondaı-aq byltyr Koreıa Respýblıkasynyń sportshylary elimizde uıymdastyrylǵan jeńil atletıkadan Azııa chempıonatynda jáne kúres túrleri boıynsha Azııa birinshiliginde baq synady. 2023 jyldyń tamyzynda koreı sportshylary ústel tennısinen Almatydaǵy «2023 WTT Contender Almaty» halyqaralyq týrnırinde óner kórsetti.
Kezdesý barysynda mınıstr eki eldiń sporttyq oqý oryndary arasynda yntymaqtastyq ornatýǵa, fýtbol boıynsha joldastyq matchtar ótkizýge, sporttyq tamaqtaný jáne sporttyq medıtsına salasyndaǵy tájirıbeni zertteýge, sondaı-aq bıomehanıka, psıhologııa jáne fızıologııa salasyndaǵy kásibı sportty zertteýmen aınalysatyn qazaqstandyq mamandardy taǵylymdamadan ótkizýge nıetti ekenin bildirdi.
«Koreıa Respýblıkasy kóptegen sport áýesqoılary men tıimdi ınvestıtsııalar sııaqty mańyzdy faktorlardyń arqasynda búginde sporttyq derjavaǵa aınalyp otyr. Biz úshin eki eldiń salalyq federatsııalary arasynda tyǵyz baılanys ornatý jáne tájirıbeni zerdeleý óte mańyzdy. Koreı sportshylaryna oqý-jattyǵý jıyndaryn ótkizýge respýblıkalyq olımpıadalyq daıarlyq bazasyn usynamyz. Sondaı-aq bıyl Qazaqstanda V Dúnıejúzilik kóshpendiler oıyndary ótetinin atap ótkim keledi. Dúbirli dodaǵa álemniń 100-den astam elinen 3 myńnan asa sportshy qatysady dep josparlap otyrmyz. Oıyndar baǵdarlamasyna dástúrli Koreı kúresi «ssırym» de engen. Koreı delegatsııasy men sportshylaryn osy aýqymdy is-sharaǵa qatysýǵa shaqyramyn», - dedi Ermek Marjyqpaev.
Koreıa Respýblıkasynyń Elshisi kezdesýge shaqyrǵanyna rızashylyǵyn bildirip, ózara yntymaqtastyqta jumys isteýge múddeli ekendigin jetkizdi. Elshi óz sózinde Dúnıejúzilik kóshpendiler oıyndaryn ótkizýge sáttilik tilep, eki el arasynda jyl saıyn damyp kele jatqan týrızm jáne sport salasynda kóptegen baılanys núkteleri bar ekenin atap ótti.
Sonymen qatar kezdesý barysynda eki eldiń ókilderi Kanvonda ótetin Jasóspirimder arasyndaǵy qysqy Olımpııa oıyndaryn talqylap, osy jarystan, qazaqstandyq sportshylardan qandaı nátıje kútetinine qatysty oı bólisti.
Eske sala keteıik, IV qysqy jasóspirimder Olımpıadasy bıyl 19 qańtar men 1 aqpan aralyǵynda Ońtústik Koreıanyń Kanvon qalasynda ótedi.
Qazaqstan namysyn sporttyń bes túri men 10 dıstsıplına boıynsha 42 sportshy qorǵaıdy. Atap aıtar bolsaq, bıatlon, kerlıng, konkımen júgirý, short-trek, shaıbaly hokkeı, shańǵy jarysy, shańǵymen tuǵyrdan sekirý, shańǵy qossaıysy, taý shańǵysy, frıstaıldan paralleldi mogýl boıynsha baq synaıdy.
