Qazaqstan men Ońtústik Koreıa smart-telemedıtsınany iske qosady
ASTANA. KAZINFORM – Aqtaýda «JI negizindegi smart-telemedıtsına: Koreıa Respýblıkasy – Qazaqstan» atty halyqaralyq sımpozıým ótti. Іs-sharanyń ashylýyndaǵy basty oqıǵa – Mańǵystaý oblystyq kópbeıindi aýrýhanasynyń bazasynda Telemedıtsına ortalyǵynyń iske qosylýy. Bul týraly Densaýlyq saqtaý mınıstrligi habarlady.
Koreılik ozyq jabdyqtarmen jaraqtandyrylǵan ortalyq erte dıagnostıka júrgizýge, ınsýltti, ókpe aýrýlaryn jáne basqa da kúrdeli patologııalardy anyqtaýǵa arnalǵan jasandy ıntellekt (JI) kómekshileri men smart-júıelerdi engizýge múmkindik beredi.
Halyqaralyq forýmǵa Mańǵystaý oblysynyń ákimi Nurdáýlet Qılybaı, QR Densaýlyq saqtaý vıtse-mınıstri Erbol Ospanov, Áýlıe Marııa halyqaralyq klınıkasynyń prezıdenti Ko Don Hen, sondaı-aq eki eldiń jetekshi medıtsına sarapshylary, ázirleýshileri men IT-ındýstrııa ókilderi qatysty.
Salanyń tsıfrlyq transformatsııasy týraly baıandama jasaǵan QR Densaýlyq saqtaý vıtse-mınıstri Erbol Ospanov júzege asyrylǵan jobalardyń aýqymyna toqtaldy.
– Búginde Qazaqstanda azamattardyń 20 mıllıonnan astam tsıfrlyq profıli qalyptastyrylǵan, al tsıfrlyq ınfraqurylym 21 myńnan astam medıtsınalyq uıymdy qamtıdy. Jyl saıyn júıe dári-dármekpen qamtamasyz etý jáne klınıkalyq qyzmetter boıynsha 400 mıllıonnan astam operatsııany óńdeıdi. Bizdiń basty baǵytymyz – EGMIS júıesi men Smart Data Healthcare platformasy negizinde medıtsınanyń biryńǵaı tsıfrlyq kontýryn qurý. Jasandy ıntellekt algorıtmderin ıntegratsııalaý dárigerdiń jumysyn jeńildetip qana qoımaı, árbir qazaqstandyqqa e-Densaulyq qosymshasynda taldaý nátıjelerin túsindirip, aýrýlardyń aldyn alý boıynsha mańyzdy qadamdardy usynatyn jeke JI-kómekshisin paıdalanýǵa múmkindik beredi, – dedi ol.
Tehnologııalar kórmesi aıasynda qazaqstandyq jáne koreılik ázirleýshiler daıyn JI-sheshimderin tanystyrdy. Olardyń qatarynda radıologııalyq sýretterdi avtomatty taldaý, ınsýlt pen kóz túbi patologııalaryn jedel dıagnostıkalaý, demikpe men ókpeniń sozylmaly obstrýktıvti aýrýyn (ÓSOA) anyqtaý úshin ókpe fýnktsııalaryn tsıfrlyq zertteý, júrek-qan tamyrlary aýrýlarynyń qaýpin baǵalaý, osteoporozǵa skrınıng júrgizý júıeleri bar.
Sonymen qatar shaǵyn kólemdi rentgen apparattary men tirek-qımyl apparaty aýrýlary bar patsıentterdi qashyqtan baqylaýǵa arnalǵan JI-platformalar kórsetildi.
Sımpozıýmnyń mańyzdy praktıkalyq nátıjeleriniń biri – koreılik áriptesterdiń telemedıtsına kabınetin jabdyqtaýǵa arnalǵan medıtsınalyq tehnıkany tabystaý rásimi jáne oblystyq aýrýhana bazasynda jańa ortalyqtyń iske qosylýy.
Bul ortalyq jetekshi sheteldik jáne respýblıkalyq klınıkalardyń mamandarymen jedel túrde qashyqtan konsılıým ótkizýge múmkindik beredi. Nátıjesinde óńirdiń shalǵaı aýdandaryndaǵy beıindi mamandar tapshylyǵy máselesin sheshýge yqpal etedi. Kezdesý qorytyndysy B2B/B2G formatyndaǵy sessııalarda bekitildi. Onda Qazaqstan men Koreıa kompanııalary birlesken tehnologııalyq jobalardy iske qosý jáne Qazaqstannyń tsıfrlyq medıtsınasyna uzaq merzimdi ınvestıtsııalar tartý máselelerin talqylady.
2027 jyldan bastap azamattar saqtandyrýsyz qandaı medıtsınalyq qyzmetterdi ala alatynyn jazǵan edik.
