Qazaqstan men Ońtústik Koreıa ózara ǵylymı-zertteý máselelerin talqylady
Koreıa Respýblıkasy Úkimetiniń shaqyrýymen uıymdastyrylǵan sapar barysynda QSZI basshysy Ońtústik Koreıanyń jetekshi taldaý ortalyqtary men iskerlik orta ókilderimen birqatar kezdesý ótkizdi. Olardyń qatarynda Shyǵys Azııa qorynyń (the East Asia Foundation) toqsan saıynǵy basylymy - Global Asia jýrnaly, Koreıa ónerkásibi federatsııasy (Federation of Korean Industries), Koreıanyń Halyqaralyq ekonomıkalyq saıasat ınstıtýty (KIEP), Koreıanyń saýda jáne ınvestıtsııalardy damytý agenttigi (KOTRA). Sonymen qatar is-sharalar baǵdarlamasynyń arasynda KOREA BIZ-TRADE SHOW 2023 bıznes-kórmesi bar.
Koreıa Respýblıkasy Prezıdentiniń syrtqy saıasat jáne ulttyq qaýipsizdik jónindegi burynǵy arnaıy keńesshisi, Global Asia bas redaktory Mýn Chon Inmen kezdesý barysynda taraptar Ortalyq Azııa zertteýleri máseleleri boıynsha saraptamalyq jáne baspa ózara árekettestik jaıly kelisti.
Mýn Chon In myrza 2023 jylǵy 13-14 shildede Astana qalasynda QSZI men QR Syrtqy ister mınıstrligi birlesip uıymdastyratyn «Ózgermeli álemdegi Azııa: bolashaqtyń kún tártibi» Ortalyq Azııadaǵy qaýipsizdik jáne yntymaqtastyq forýmyna qatysýǵa shaqyrǵany úshin alǵys bildirip, asa qyzyǵýshylyq tanytatyny týraly aıtty.
Koreıanyń basqa iri taldaý ortalyqtarynyń basshylarymen kezdesý barysynda QSZI dırektory Erkin Tuqymov respýblıkamyzda ótkizilip jatqan modernızatsııa jaıly aıtty. «Qazirgi tańda Qazaqstan damýdyń sheshýshi kezeńinde tur. Sondyqtan el ekonomıkasyna ınvestıtsııalar tartý asa mańyzdy bolyp otyr. Bul rette Qazaqstan Eýrazııanyń eń serpindi damyp kele jatqan jáne turaqty elderiniń biri. Aýyl sharýashylyǵynda úlken ınvestıtsııalyq áleýet baıqalady. Óıtkeni biz azyq-túlik qaýipsizdigin qamtamasyz etýdegi óz rólimizdi nyǵaıtqymyz keledi. Sonymen qatar bizdiń elimizde tabıǵı resýrstardyń úlken qory bar. Biraq biz ekonomıkany ártaraptandyryp, onyń shıkizattyq baǵytynan alshaqtatqymyz keledi. Sondyqtan qazaqstandyq shıkizatty paıdalana otyryp, ónerkásiptik jobalarǵa sheteldik kapıtaldyń aǵynyn qamtamasyz etý maqsatyn qoıyp otyrmyz», – dedi E.Tuqymov.
Sondaı-aq ınstıtýt basshysy Ońtústik Koreıa Qazaqstannyń eń mańyzdy seriktesteriniń bestigine kiretinin aıtty. «2022 jyly elderimiz arasyndaǵy taýar aınalymy 2021 jylǵa qaraǵanda eki ese artyp, 6,1 mıllıard AQSh dollaryn qurady. Ekonomıkalyq qarym-qatynastardy damytyp, basqa sferalardaǵy yntymaqtastyqty ilgeriletý kerek», – dep atap ótti QSZI dırektory.
Koreıa ónerkásibi federatsııasynyń ókili Kım Bong Man myrza Qazaqstannyń adamı kapıtalyna joǵary baǵa berdi. «Sizdiń orasan zor elińizdiń damý áleýeti úlken. Qazaqstan Ortalyq Azııanyń júreginde ornalasqan. Dástúrli jetkizý tizbegin ózgertý qajettiligi turǵysynan koreı kompanııalary Qazaqstanǵa óńirdiń óndiristik haby retinde ınvestıtsııa salýǵa daıyn ekenine senimdimin», – dedi Kım Bong Man myrza.
Erkin Tuqymov KIEP vıtse-prezıdenti Cýn Chon Djýn myrzamen kelissóz barysynda QSZI qyzmeti týraly suraqtarǵa jaýap bere otyryp, álemniń eń ártaraptandyrylǵan ekonomıkasynyń ıesi retinde Ońtústik Koreıanyń ekonomıkalyq jańǵyrtý tájirıbesi Qazaqstan úshin zertteý jáne praktıkalyq turǵyda úlken qyzyǵýshylyq týdyratynyn málimdedi.
Óz kezeginde KOTRA Agenttiginiń Eýropa, Amerıka jáne TMD-men ózara árekettestik departamentiniń dırektory Kım Djýn Han myrza: «Biz Qazaqstannyń aımaqtyń negizgi memleketteriniń birine aınalyp jatqanyn kórip otyrmyz. Ońtústik Koreıadaǵy kompanııalar Qazaqstan naryǵynyń áleýetin joǵary baǵalaıdy. Statıstıka eksporttyń eki ese óskenin kórsetedi. Adamı kapıtaldy damytý salasyndaǵy yntymaqtastyq keńeıip jatyr. Mysaly, Qazaqstannan kóptegen stýdentter Ońtústik Koreıanyń joǵary oqý oryndarynda oqıdy», – dedi Kım Djýn Han myrza.
QSZI basshysy óziniń Ońtústik Koreıadaǵy áriptesterimen elektr avtomobılderin óndirý, aýyl sharýashylyǵy, logıstıkalyq marshrýttardy, ásirese Orta dáliz sııaqty qos eldiń kooperatsııasynyń perspektıvalyq salalaryn talqylady. Taraptar birlesken Qazaqstan-Koreıa ınvestıtsııalyq jobalaryn ázirleýge jáne iske asyrýǵa zor qyzyǵýshylyq tanytty. Sondaı-aq jaqyn arada saraptamalyq jáne ǵylymı-zertteý yntymaqtastyǵyn damytýǵa úmit bildirdi.
