Qazaqstan men óńir elderi jańa kólik dálizderin damytýǵa basymdyq bermek
ASTANA. KAZINFORM - Qazaqstan Respýblıkasy Kólik mınıstrliginiń ókilderi Ortalyq Azııa aımaqtyq ekonomıkalyq yntymaqtastyq (OAAEY) baǵdarlamasynyń kólik sektoryn úılestirý komıtetiniń 23-otyrysyna qatysty, dep habarlaıdy QR Kólik msınıstrliginiń baspasóz qyzmeti.
Atalǵan jıyn Mońǵolııanyń Ulan-Batyr qalasynda ótti.
Otyrys barysynda óńir elderiniń qatysýshylary OAAEY kólik júıesin damytýǵa qatysty negizgi máselelerdi talqylady.
Olardyń qatarynda halyqaralyq kólik dálizderin jańǵyrtý, tranzıttik baǵyttardyń tıimdiligin arttyrý, avtomobıl joldaryn damytý jáne qatysýshy memleketter arasyndaǵy kólik baılanysyn nyǵaıtý máseleleri qaraldy.
Sondaı-aq birlesken ınfraqurylymdyq jobalardy iske asyrýǵa, jol salasynda zamanaýı tehnologııalyq sheshimderdi engizýge, sondaı-aq óńirlik kólik jelisiniń qaýipsizdigi men ornyqtylyǵyn arttyrýǵa erekshe nazar aýdaryldy.
Mınıstrlik ókilderiniń úılestirý komıtetiniń jumysyna qatysýy óńirlik yntymaqtastyqty nyǵaıtýǵa, ulttyq bastamalardy ilgeriletýge jáne kólik ınfraqurylymyn damytý salasyndaǵy ozyq tájirıbemen almasýǵa baǵyttalǵan.
OAAEY (Central Asia Regional Economic Cooperation) — Azııa damý bankiniń úılestirýimen 11 el men damý seriktesterin biriktiretin óńirlik yntymaqtastyq baǵdarlamasy. Baǵdarlama kólik dálizderin, saýda baılanysyn, energetıkany jáne tsıfrlyq ıntegratsııany damytýǵa baǵyttalǵan, sondaı-aq óńirdiń turaqty ekonomıkalyq ósýine yqpal etedi.
Osyǵan deıin Qasym-Jomart Toqaev EAEO elderine tsıfrlyq kólik dálizderiniń ekojúıesin qurýdy usynǵan bolatyn.
