Qazaqstan men Oman jańa halyqaralyq logıstıkalyq dáliz qurýdy kózdeıdi
ASTANA. KAZINFORM — Astanada QR Premer-mınıstriniń orynbasary — ulttyq ekonomıka mınıstri Serik Jumanǵarın Qazaqstanǵa alǵashqy resmı saparmen kelgen Oman Sultandyǵynyń qarjy mınıstri Sultan ben Sálim Ál Habsımen kezdesti, dep habarlaıdy Úkimettiń baspasóz qyzmeti.
Taraptar sońǵy jyldary Qazaqstan-Oman qatynastarynyń belsendi túrde damyp kele jatqanyn atap ótti. Serik Jumanǵarın Qazaqstan Oman Sultandyǵyn Taıaý Shyǵystaǵy mańyzdy jáne senimdi áriptes retinde qarastyratynyn erekshe atap ótti.
Oman qarjy mınıstri óz kezeginde Oman 1992 jyly Kaspıı qubyr konsortsıýmyn (KQK) qurý jónindegi jobaǵa qatysqan kezden bastap táýelsiz Qazaqstan ekonomıkasyndaǵy alǵashqy ınvestordyń biri bolǵanyn eske aldy. Ol óz eliniń ınvestıtsııalyq yntymaqtastyqty odan ári damytýǵa múddeli ekenin maquldap, sondaı-aq Qazaqstannan ınvestıtsııa qabyldaýǵa daıyn ekenin bildirdi.
Kelissózde kólik-logıstıkalyq ózara is-qımyl máselesine erekshe nazar aýdaryldy. Omannyń strategııalyq geografııalyq jaǵdaıyn, onyń Taıaý Shyǵystaǵy iri logıstıkalyq habqa aınalý josparyn eskere otyryp, qazaqstandyq tarap Iran aýmaǵy arqyly «Qazaqstan – Oman» jańa halyqaralyq kólik dálizin qurý múmkindigin qarastyrýdy usyndy. Bastamany egjeı-tegjeıli pysyqtaý maqsatynda Qazaqstan, Oman jáne Iran sarapshylarynyń qatysýymen úsh jaqty jumys toby qurylýy tıis.
Budan basqa, tranzıttik tasymal kólemin ulǵaıtý jáne «Soltústik – Ońtústik» halyqaralyq kólik dáliziniń ınfraqurylymyn damytý boıynsha birlesken jumys perspektıvasy talqylandy.
Búgingi tańda Omannyń Qazaqstan ekonomıkasyna salǵan ınvestıtsııasynyń jıyntyq kólemi $253 mln. Bul rette eki tarap ekijaqty áriptestiktiń bolashaǵy bul kórsetkishten edáýir asyp túsetinin atap ótti.
— Oman ınvestıtsııalyq bankiniń $500 mln kóleminde qarjy salatyn birlesken ınvestıtsııalyq qor qurý jónindegi bastamasy bizdiń zor qyzyǵýshylyǵymyzdy týǵyzdy. Qazaqstan Úkimeti salyqtyq preferentsııalarǵa, ındýstrııalyq aımaqtarǵa qol jetkizýmen ınfraqurylymdyq qoldaý kórsete otyryp, jańa ınvestorlardy tartý úshin qajetti jaǵdaı jasaýǵa daıyn, — dep atap ótti Serik Jumanǵarın.
Qazaqstandyq tarap ta energetıka, taý-ken metallýrgııa ónerkásibi, AÓK, farmatsevtıka men saýda sııaqty perspektıvalyq salalarda yntymaqtastyqty arttyrýǵa múddeli. Oman óz tarapynan logıstıkalyq áriptestikke degen joǵary senimin atap kórsetip, Sultandyqtyń ınfraqurylymy iri júk qabyldaýǵa jáne aýystyryp tıeýge tolyq daıyn ekenin málimdedi. Qazaqstandyq astyqty jetkizýge muqııat nazar aýdaryldy: Oman sultandyqqa astyq jetkizýge qyzyǵýshylyq bildirip, Taıaý Shyǵystaǵy astyq eksportyn taratý haby bolýǵa ekenin jetkizdi.
Kezdesýdiń túıini retinde taraptar bastamalardy saraptamalyq deńgeıde talqylaýǵa ýaǵdalasty. Barlyq sóz qozǵalǵan salalarda shyn mánindegi yntymaqtastyqqa ózara daıyn ekendikterin jetkizdi.
Buǵan deıin habarlanǵandaı, Úkimette Qazaqstan–Aýǵanstan saýda baılanystaryn keńeıtý joldary talqylandy.