Qazaqstan men Oman sultandyǵynyń qarym-qatynasy qaıta jandanady
ASTANA. KAZINFORM – Elimizge Oman sultandyǵynyń Syrtqy ister mınıstri Badr ben Hamad Ál-Býsaıdı resmı saparmen keldi.
Elordada mártebeli meımandy QR Premer-mınıstriniń orynbasary – Syrtqy ister mınıstri Murat Nurtileý qarsy aldy. Syrtqy ister mınıstrliginde ótken kezdesýde ol Qazaqstan Ortalyq Azııadaǵy Omannyń jetekshi ekonomıkalyq seriktesi bolýǵa yntaly ekenin aıtty.
— Qazaqstan Ortalyq Azııadaǵy Omannyń jetekshi ekonomıkalyq seriktesi bola otyryp, saýda yntymaqtastyǵymyzdyń áleýetin tolyq iske asyrýǵa umtylady. Oman ekonomıkamyzǵa laıyqty ınvestıtsııalar saldy. Búgingi kúnge deıin jalpy kapıtal aǵyny 253 mıllıon dollardan asty.
Osy rýhta biz Omannyń Qazaqstan men kórshi elder úshin Tikeleı ınvestıtsııalar qoryn qurý jónindegi bastamasyn tolyq qoldaımyz. Búgingi kezdesý bizdiń kún tártibimiz úshin odan da kóp ózara tıimdi nátıje beretinine senemin, - dedi QR SІM basshysy.
Onyń aıtýynsha, eki el arasyndaǵy ekonomıkalyq baılanystardy nyǵaıtý – mádenı jáne halyqtar arasyndaǵy baılanystardy keńeıtýge múmkindik beredi. Máselen, ótken jyly Omanǵa qazaqstandyq sapar shegýshiler sany 37%-ǵa ósip, 21 myń adamǵa deıin jetti.
Búgin Murat Nurtileý men Badr ben Hamad Ál-Býsaıdı kelissózder ótkizedi dep josparlanǵan.
Oman sultandyǵynyń SІM basshysy elimizge sońǵy ret 2004 jyly resmı saparmen kelgen eken.
Astanadaǵy «Saltanat saraıyn» salýǵa dál osy Oman sultandyǵy qarjy bólgeni el esinde. Bul kezdesý araǵa 20 jyldaı ýaqyt salyp, eki el arasyndaǵy qarym-qatynastyń tamyryna qaıta qan júgire bastaǵanyn bildiredi.
Aıta keteıik, buǵan deıin Oman Qazaqstanǵa Ortalyq Azııa tikeleı ınvestıtsııalar qoryn qurýda seriktes bolýdy usynǵan edi.