Qazaqstan men Oman sheneýnikterdi vızadan bosatýǵa kelisti
ASTANA. QazAqparat - Oman Sultandyǵynyń astanasy Maskatta Qazaqstan Respýblıkasy men atalmysh el úkimetteri arasyndaǵy dıplomatııalyq, arnaıy jáne qyzmettik pasporttar ıelerin vızalyq talaptardan ózara bosatý týraly kelisimge qol qoıyldy, dep habarlaıdy QazAqparat.
QR syrtqy saıasat vedomstvosynan málim etkendeı, qujatqa Qazaqstannyń Omandaǵy Elshisi Erjan Muqash pen Oman Syrtqy ister mınıstriniń orynbasary Mýhamed bın ıÝsýf bın Qasym Az-Zarafı qol qoıdy.
Úkimetaralyq kelisimge qol qoıý - eki el arasyndaǵy sharttyq-quqyqtyq bazany júıeli keńeıtýge mańyzdy qadam boldy.
Aıta keter jáıt, ótken jyly Oman Úkimetiniń sheshimi boıynsha Qazaqstan azamattary AQSh, Kanada, Aýstralııa, Ulybrıtanııa, sondaı-aq Shengen kelisimi elderiniń vızalary nemese osy elderde turaqty turýǵa ruqsattary bar bolǵan jaǵdaıda, týrıstik vızalardy veb-saıt arqyly (e-vıza) jergilikti demeýshisiz ala alatyn 25 eldiń tizimine engizildi. Bul jaǵdaı Qazaqstan men Oman arasynda ekijaqty týrızm salasyndaǵy qarym-qatynastardy nyǵaıtýǵa múmkindik beretini sózsiz.
Óz kezeginde Oman Sultandyǵy Qazaqstan vızasyn shaqyrýsyz, jeńildetilgen tártip boıynsha qysqa merzimge ala alatyn 48 memlekettiń qataryna enedi.
