Qazaqstan men Oman energetıka men tsıfrlandyrý salalarynda yntymaqtastyqty keńeıtedi
ASTANA. KAZINFORM – Memleket basshysy Oman Sultandyǵy Premer-mınıstriniń ekonomıkalyq máseleler jónindegi orynbasary Zııazın ben Haısam Ál Saıdty qabyldady. Bul týraly Aqordanyń baspasóz qyzmeti habarlady.
Kezdesý barysynda Prezıdent Qasym-Jomart Toqaev Oman arab álemindegi ýaqyt tezinen ótken senimdi seriktesimiz sanalatynyn, Qazaqstannyń yntymaqtastyqty jan-jaqty nyǵaıtýǵa beıil ekenin jetkizdi.
– Ekijaqty saıası-ekonomıkalyq baılanystarymyz nyǵaıyp kele jatyr. Qazaqstan men Oman arasyndaǵy yntymaqtastyqty arttyrýǵa qosqan úlesińizdi erekshe atap ótkim keledi. Osy oraıly sátti paıdalana otyryp, Sultan Haısam ben Tarıq Ál Saıdqa sálemim men izgi tilegimdi joldaımyn. Uly mártebeli Sultannyń Astanaǵa saparmen kelýin kútemiz, - dedi Qasym-Jomart Toqaev.
Premer-mınıstrdiń orynbasary qonaqjaılyqpen qarsy alǵan Qazaqstan Prezıdentine alǵys aıtyp, Oman tarapy memleketaralyq yqpaldastyqty odan ári damytýǵa nıetti ekenin rastady.
– Qazaqstan – óte ásem ári mádenı muraǵa baı el. Sizge Uly mártebeli Sultannyń sálemin jetkizý men úshin úlken qurmet. Ózińizge málim, eki eldiń qarym-qatynasy 1992 jyldan bastaý alady. Osylaısha, Shyǵanaqtaǵy arab memleketteriniń yntymaqtastyq keńesine múshe elder arasynda alǵashqylardyń biri bolyp Qazaqstanmen dıplomatııalyq baılanys ornattyq. Bizdi barlyq baǵytty, sonyń ishinde mádenıet, saýda, ekonomıka jáne týrızm salalaryn qamtyǵan tyǵyz yqpaldastyq baılanystyrady. Atalǵan yntymaqtastyq aldaǵy ýaqytta da jalǵasyn tabady dep úmittenemiz, - dedi Zııazın ben Haısam Ál Saıd.
Qazaqstan Prezıdenti Taıaý Shyǵystaǵy ahýal ýshyqqan qazirgi sátte baýyrlas Oman halqyn qoldaıtynyn taǵy da atap ótti.
Memleket basshysy aımaqtaǵy beıbitshilik pen turaqtylyqty saqtaýǵa erekshe kúsh jumsap kele jatqan Omannyń halyqaralyq arenadaǵy bedelin joǵary baǵalady.
Áńgimelesý barysynda eki eldiń saýda-ekonomıkalyq yntymaqtastyǵyn keńeıtý perspektıvasy talqylandy. Ásirese, energetıka, metallýrgııa, kólik-logıstıka, aýyl sharýashylyǵy, tsıfrlandyrý salalaryndaǵy yqpaldastyqqa, mádenı-gýmanıtarlyq baılanystardy jandandyrýdyń mańyzyna nazar aýdaryldy.
Buǵan deıin Memleket basshysynyń Katrına Klaas-Mıýlhoızerdi qabyldaǵanyn habarlaǵan edik.
