Qazaqstan men Oman arasynda tikeleı áýe qatynasy ashyldy
ASTANA. KAZINFORM — Astanadan Omanǵa alǵashqy reıspen 140 jolaýshy ushty, dep habarlaıdy Kólik mınıstrliginiń baspasóz qyzmeti.
2026 jylǵy 24 qazanda, Qazaqstan Respýblıkasynyń kúni qarsańynda, «Air
Astana» áýe kompanııasynyń Astana — Salala (Oman Sultandyǵy) baǵyty boıynsha jańa halyqaralyq áýe reısin ashý saltanaty ótti. Reıster Airbus A320 úlgisindegi áýe kemelerimen oryndalady.
Jańa baǵyttyń ashylýy Memleket basshysynyń avıatsııa salasyn damytý,
halyqaralyq ushý baǵyttarynyń geografııasyn keńeıtý jáne Qazaqstannyń tranzıttik avıatsııalyq hab retindegi ustanymyn nyǵaıtý jónindegi tapsyrmasyn oryndaý aıasynda júzege asyrylyp jatyr.
Eki el arasyndaǵy áýe qatynasyn damytýdaǵy mańyzdy qadamdardyń biri —
aǵymdaǵy jylǵy 6 qazanda Qazaqstan Prezıdenti Qasym-Jomart Toqaev pen Oman
Sultany Haısam ben Tarıq Ál Saıdtyń kezdesýi aıasynda Qazaqstan Respýblıkasynyń Úkimeti men Oman Sultandyǵynyń Úkimeti arasynda áýe qatynasy týraly kelisimge qol qoıylýy boldy.
Jańa reıstiń ashylýyna arnalǵan saltanatty rásimge Qazaqstan Respýblıkasy
Kólik vıtse-mınıstri Talǵat Lastaev, «Air Astana» áýe kompanııasynyń aǵa
vıtse-prezıdenti Erbolat Baısalyqov, sondaı-aq Nursultan Nazarbaev halyqaralyq áýejaıynyń basqarma tóraǵasynyń orynbasarlary Rýslan Pyshtanov pen Ermek Kúmispaev, Oman Sultandyǵynyń Qazaqstan Respýblıkasyndaǵy Elshiliginiń ókilderi qatysty.
Alǵashqy reıspen 140 jolaýshy ushty, bul áýe kemesindegi oryndardyń tolyq
tolǵanyn kórsetedi. Bir kún buryn, 23 qazanda, Almatydan Salala qalasyna
alǵashqy reıs oryndalyp, ondaǵy jolaýshylar oryndary da tolyq toldy.
Qazirgi ýaqytta Qazaqstan men Oman arasyndaǵy áýe qatynasy SalamAir áýe
kompanııasynyń Almaty — Maskat baǵyty boıynsha da júzege asyrylyp jatyr. Osylaısha, qazaqstandyq áýe tasymaldaýshy Oman Sultandyǵyna eki jańa baǵyt ashý arqyly óziniń halyqaralyq marshrýttyq jelisin keńeıtti.
Jańa áýe baǵyttarynyń ashylýy Qazaqstan men Oman arasyndaǵy týrıstik,
saýda-ekonomıkalyq jáne mádenı baılanystardy damytýǵa, sondaı-aq azamattardyń saıahattaý múmkindikterin keńeıtýge yqpal etedi.
Buǵan deıin Qazaqstan men Oman ınvestıtsııa, áýe qatynasy jáne munaı-gaz salasynda jańa kelisimder jasaǵanyn jazǵan edik.
