Qazaqstan men OA elderiniń shekarasynda sheshilmegen túıin joq - Elbasy

ASTANA. QazAqparat - Qazaqstan men Orta Azııa elderiniń shekarasynda sheshilmegen túıin joq. Bul týraly búgin Aqordada ótken Ortalyq Azııa elderi basshylarynyń jumys (konsýltatıvtik) kezdesýi qorytyndysyna oraı BAQ ókilderine arnalǵan baspasóz máslıhatynda Qazaqstan Prezıdenti Nursultan Nazarbaev aıtty, dep habarlaıdy QazAqparat.

«Bizdiń elderimizdiń arasyndaǵy kelisilgen ustanymdy ázirleý úshin óńir elderiniń Qaýipsizdik keńesi apparattarynyń arasyndaǵy besjaqty turaqty konsýltatsııalar mehanızmin bekitýdi usyndyq», - dep atap ótti Memleket basshysy. 

Nursultan Nazarbaev  eń bastysy Qazaqstan barlyq Ortalyq Azııa elderimen shekarasyn demarkatsııalaý boıynsha sharttardy tolyǵymen aıaqtaǵanyn basa aıtty.

«Delımıtatsııa boldy. Ózbekstanmen demarkatsııa jasaldy. Qazaqstannyń Túrikmenstanmen, Ózbekstanmen aradaǵy túıisý núktesi bar. Barlyǵyna qol qoıyldy. Shekarada sheshilmegen eshqandaı másele qalmady», - dep atap ótti Memleket basshysy.

Qazaqstan Prezıdenti shekara máselesi túbegeıli sheshilmegen kezde qaqtyǵystar oryn alyp, adamdardyń qaza bolǵanyn eske saldy.

«Bul óte mańyzdy sát ekendigin taǵy da bir basa aıtqym keledi. Delegatsııa basshylary óńirimizdegi qaýipsizdik pen turaqtylyqty nyǵaıtý protsesin jedeldetý qajettigin qýattady», - dedi Elbasy.

Aıta keteıik, Aqordada ótken keńeske Qazaqstan Prezıdenti Nursultan Nazarbaev, Qyrǵyz Respýblıkasynyń Prezıdenti Sooronbaı Jeenbekov, Tájikstan Respýblıkasynyń Prezıdenti Emomalı Rahmon, Ózbekstan Respýblıkasynyń Prezıdenti Shavkat Mırzıeev jáne Túrikmenstan Medjlıs tóraıymy A.T.Nýrberdyeva hanym qatysty.