Qazaqstan men Norvegııa arasyndaǵy júk tasymalyna otandyq kompanııalar engiziledi
ASTANA. QazAqparat - Qazaqstannan Norvegııaǵa astyq tasymaldaý kólemi qalpyna keltiriledi. Bul týraly Parlament Májilisiniń jalpy otyrysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Kelisim jobasymen avtomobıl tasymaldaryn júzege asyrý úshin quqyqtyq norma ornatylady. Osy qujatqa sáıkes, ekijaqty tranzıttik tasymaldar, sonymen qosa úshinshi elderden nemese úshinshi elderge tasymaldy ruqsat berý negizinde júzege asyrylady. Atalǵan sharttar otandyq tasymaldaýshylar úshin tıimdi. Óıtkeni qazirgi ýaqytta eki el arasyndaǵy júk tasymaldaryn úshinshi elderdiń ókilderi, ıaǵnı Belarýs jáne Reseı kólik kompanııalary iske asyrýda»,-dedi mınıstr «Qazaqstan Respýblıkasynyń Úkimeti men Norvegııa Koroldiginiń Úkimeti arasyndaǵy Halyqaralyq avtomobıl tasymaldary týraly kelisimdi ratıfıkatsııalaý týraly» zań jobasyn tanystyrý barysynda.
Onyń sózine qaraǵanda, 2016 jyly Qazaqstan men Norvegııa arasynda avtomobılmen júk tasymal kólemi 53 paıyzǵa ulǵaıdy.
Budan bólek, zań jobasyn talqylaý barysynda mınıstr atalǵan elmen júk tasymaly deńgeıin arttyrýdyń bolashaǵy zor ekenin atap ótti.
«Búginde taýar aınalymynda artyqshylyq bar, ıaǵnı negizinen bul balyq ónimderine baılanysty. Osyǵan deıin bizde astyq tasymaldaýda jaqsy kórsetkish boldy, bul ónim temir jol kóligimen jetkizilip júr. Alaıda ótken jyly astyq kólemi birshama tómendedi. Búginde biz Norvegııaǵa qazaqstandyq astyqty jetkizý kólemin jandandyrýdy baǵytynda jumystardy júrgizip jatyrmyz»,-dedi J. Qasymbek.
Onyń aıtýynsha, júk Sankt-Peterbordyń portyna deıin jetkizilip, ary qaraı parommen Norvegııaǵa ótedi.
«Jyldyń qorytyndysy boıynsha saýda teńgerimi qaıta qalpyna keledi dep úmittenemiz»,-dedi ol.
