Qazaqstan men Norvegııa arasyndaǵy readmıssııa týraly kelisim qabyldandy
ASTANA. QazAqparat - Búgin QR Parlamenti Senatynyń jalpy otyrysynda «Qazaqstan Respýblıkasynyń Úkimeti men Norvegııa Koroldigi Úkimeti arasyndaǵy Adamdardyń readmıssııasy týraly kelisimdi ratıfıkatsııalaý týraly» QR Zańy qabyldandy.
Qujat Memleket basshysynyń qol qoıýyna joldanady.
Іshki ister mınıstri Qalmuhanbet Qasymovtyń aıtýynsha, kelisimge 2010 jyldyń 12 qazanynda Oslo qalasynda Qazaqstan men Norvegııa syrtqy ister mınıstrleri qol qoıǵan.
«Qujat Qazaqstan men Norvegııa elderiniń aýmaǵyna kirý jáne onda bolý sharttaryn buzǵan adamdardy anyqtaýdy jáne qaıtarýdy kózdeıdi. Bul sanatqa elimizdiń aýmaǵyna zańsyz kirgen nemese zańdy kirgen, biraq vızanyń ruqsat merzimi ótip ketkennen keıin sonda qalǵan adamdar jatady. Tutastaı alǵanda, kelisim zańsyz kóshi-qonmen kúresýge múmkindik beredi. Budan bólek, eldiń aýmaǵynda zańsyz júrgen adamdardy halyqaralyq quqyqqa sáıkes qabyldaýdy, sondaı-aq olardyń tranzıtin jeńildetedi», - dedi QR Іshki ister mınıstri Q. Qasymov.
Onyń aıtýynsha, zańdy qabyldaý zańsyz kóshi-qonmen kúresti kúsheıtip, tulǵalardyń tranzıtin jeńildetedi. Qujat teris áleýmettik-ekonomıkalyq jáne quqyqtyq saldarǵa ákep soqtyrmaıdy. Sondaı-aq, zańdy qabyldaý qosymsha qarajatty talap etpeıdi.
