Qazaqstan men Norvegııa arasyndaǵy taýar aınalymy 37%-ǵa ósti
ASTANA. KAZINFORM — Elordada Qazaqstan-Norvegııa iskerlik keńesiniń ekinshi otyrysy bastaldy. Onda eki eldiń memlekettik qurylymdary, bıznes, damý ınstıtýttary men kompanııalarynyń ókilderi bas qosyp, saýda-ekonomıkalyq jáne ınvestıtsııalyq yntymaqtastyq perspektıvalaryn talqylap jatyr.
Qazaqstannyń Syrtqy saýda palatasy basqarmasynyń tóraǵasy Murat Qarymsaqovtyń aıtýynsha, eki el arasyndaǵy ekonomıkalyq baılanys nyǵaıyp keledi. 2025 jyly Qazaqstan men Norvegııa arasyndaǵy ózara saýda kólemi 37%-ǵa ósip, shamamen 170 mıllıon dollar boldy.
— Bul kórsetkishter taýar aǵynynyń keńeıgenin, yntymaqtastyqtyń jańa baǵyttary paıda bolǵanyn jáne eń bastysy — Norvegııa men Qazaqstan kásipkerleri arasyndaǵy senimniń qalyptasyp jatqanyn kórsetedi, — dedi Murat Qarymsaqov.
Óz sózinde spıker Qazaqstannyń «jasyl» transformatsııa, tsıfrlandyrý jáne ınvestıtsııalyq ahýaldy jaqsartý baǵytynda belsendi jumys júrgizip jatqanyn atap ótti. Osyǵan baılanysty Qazaqstanǵa zamanaýı tehnologııalar salasyndaǵy norvegııalyq tájirıbe erekshe mańyzdy.
Syrtqy saýda palatasy basshysynyń aıtýynsha, aýyl sharýashylyǵy, balyq ónimderin óńdeý, aınalym ekonomıkasy, kólik jáne logıstıka salalary yntymaqtastyqtyń perspektıvaly baǵyttary sanalyp otyr.
Qazirgi tańda Qazaqstanda Optimar, Eksfin, Cambi, Gexcon, Mill, AkvaGroup, Jotun jáne Vester sekildi 18 norvegııalyq kompanııa bıznes júrgizip keledi. M. Qarymsaqovtyń aıtýynsha, olardyń kópshiligi kelissózderden naqty birlesken jobalardy júzege asyrý kezeńine ótken. Mysal retinde ol qazaqstandyq Organic Fish kompanııasy men norvegııalyq Optimar kompanııasy arasyndaǵy ózara túsinistik týraly memorandýmǵa qol qoıylǵanyn aıtty.
Kezdesýde kólik-logıstıka salasyndaǵy yntymaqtastyqty damytýǵa aıryqsha nazar aýdaryldy. Murat Qarymsaqovtyń aıtýynsha, Qazaqstan Eýrazııadaǵy negizgi tranzıttik habtardyń biri bolyp qala beredi.
— Qytaıdan Eýropaǵa baǵyttalǵan qurlyq tranzıtiniń 70%-y Qazaqstan aýmaǵy arqyly ótedi. Biz birlesip mýltımodaldy dálizder quryp, jetkizý tizbekterin nyǵaıtyp, óndiristen bastap túpki tutynýshyǵa deıingi barlyq kezeńde qosymsha qun qalyptastyra alamyz, — dedi ol.
Sonymen birge, qatysýshylarǵa bıznesti qoldaý sharalary men ınvestıtsııa tartýǵa arnalǵan tsıfrlyq quraldar tanystyryldy. Atap aıtqanda, Qazaqstanda «Qazir jáne osynda» platformasy jumys isteıdi. Onda jalpy quny shamamen 130 mıllıard dollar bolatyn 1600-den astam joba usynylǵan.
Aıta keteıik, Shengen aımaǵy elderinde avtomattandyrylǵan kirý-shyǵý júıesi engizildi jáne kirý talaptary ózgerdi.
