Qazaqstan men Nıderlandy arasyndaǵy saýda seriktestigi 160 mln eýromen nyǵaıady
ASTANA. KAZINFORM — QR Saýda jáne ıntegratsııa mınıstri Arman Shaqqalıevtiń Nıderland Koroldigine jumys sapary aıasynda Qazaqstan–Nıderland bıznes-forýmy ótti. Forým qorytyndysy boıynsha kelisimderge qol qoıylyp, jalpy somasy 160 mln eýrony quraıtyn birlesken jobalardy iske asyrý jóninde ýaǵdalastyqtarǵa qol jetkizildi. Bul týraly vedomstvonyń baspasóz qyzmeti málim etti.
Forým GreenTech Amsterdam 2026 halyqaralyq kórmesiniń alańynda ótti jáne Qazaqstannyń Nıderlandtaǵy saýda-ekonomıkalyq mıssııasynyń negizgi is-sharasyna aınaldy. Kórmege álemniń 40-tan astamelinen 500-den astam kompanııa men uıym qatysty, al kelýshiler álemniń 120 elinen keldi.
2025 jylǵy aldyńǵy kórmede 41 elden 550 eksponent usynylyp, kelýshiler álemniń 120 elinen kelgen bolatyn.
— Kórmedegi Qazaqstannyń erekshe mártebesi Qazaqstan Respýblıkasy Saýda jáne ıntegratsııa mınıstri Arman Shaqqalıevtiń GreenTech Amsterdam 2026 resmı ashylý saltanatyna qatysýymen aıqyndaldy. Kórmeniń ashylýynda sheteldik qatysýshylar arasynan Qazaqstan men Birikken Arab Ámirlikteriniń mınıstrleri ǵana quttyqtaý sóz sóıledi. Bul eki eldiń agroónerkásiptik keshen men agrotehnologııalar salasyndaǵy halyqaralyq yntymaqtastyqty damytýdaǵy róliniń joǵary baǵalanatynyn kórsetedi, — delingen habarlamada.
Nıderland Qazaqstannyń Eýropalyq Odaqtaǵy negizgi saýda-ekonomıkalyq áriptesteriniń biri bolyp qalaberedi. 2026 jylǵy qańtar–aqpan qorytyndysy boıynsha ózara taýar aınalymy ótken jyldyń sáıkes kezeńimen salystyrǵanda 57,9%-ǵa ulǵaıyp, 970 mln AQSh dollaryna jetti. Qazaqstandyq eksport 930,4 mln AQSh dollaryn qurap, 65% ósim kórsetti.
— Búgingi ýaǵdalastyqtar eki el bıznesiniń ózara qyzyǵýshylyǵynyń joǵary deńgeıin rastaıdy. Qazaqstan eýropalyq naryqtarǵa sapaly ónim jetkizýdi keńeıtýge jáne nıderlandtyq seriktesterdiń qatysýymen ınvestıtsııalyq jobalardy iske asyrý úshin qolaıly jaǵdaılar jasaýǵa daıyn, — dep atap ótti Arman Shaqqalıev.
Bıznes-forýmǵa agroónerkásiptik keshen, tamaq ónerkásibi jáne logıstıka salalaryndaǵy qazaqstandyq kompanııalar qatysty. Qatysýshylar otandyq óndirýshilerdiń eksporttyq áleýetin tanystyryp, nıderlandtyq seriktesterimen birqatar B2B kezdesýler ótkizdi.
Sapar aıasynda qazaqstandyq delegatsııa Nıderlandtyń jetekshi memlekettik jáne salalyq uıymdarymen kelissózder júrgizdi. Negizgi taqyryptardyń biri memleket pen akkredıttelgen salalyq uıymdardyń ózara is-qımylyna negizdelgen ınspektsııalyq baqylaýdyń nıderlandtyq modelin zerdeleý boldy. Mundaı model ónim qaýipsizdiginiń joǵary deńgeıin jáne eksporttyq rásimderdiń jedeldigin qamtamasyz etedi.
Naktuinbouw uıymynyń basshylyǵymen tuqym sharýashylyǵy, sertıfıkattaý jáne aýyl sharýashylyǵy ónimderiniń sapasyn baqylaý salasyndaǵy yntymaqtastyqty damytý máseleleri talqylandy. Taraptar sondaı-aq ónimniń qadaǵalanýyn qamtamasyz etýdiń zamanaýı júıelerin engizý boıynsha tájirıbe almasý jáne ónimniń halyqaralyq talaptarǵa sáıkestigin rastaý múmkindikterin qarastyrdy, bul Qazaqstannyń eksporttyq áleýetin keńeıtý úshin mańyzdy mánge ıe.
— Kelissózderdiń jeke blogy kólik-logıstıka salasyndaǵy yntymaqtastyqty damytýǵa arnaldy. Rotterdam portyna barý barysynda taraptar halyqaralyq tasymaldar salasyndaǵy ózara is-qımyldy keńeıtý, qazaqstandyq ónimdi eýropalyq logıstıkalyq tizbekterge ıntegratsııalaý jáne otandyq eksportty ilgeriletý úshin Eýropadaǵy eń iri teńiz habynyń áleýetin paıdalaný múmkindikterin qarastyrdy, — dep habarlady vedomstvodan.
Taraptar Transkaspıı halyqaralyq kólik baǵytyn (Orta dáliz) odan ári damytý perspektıvalaryna erekshe nazaraýdardy. Onyń jahandyq logıstıkalyq tizbekterdiń transformatsııasy jaǵdaıynda Azııa men Eýropa arasyndaǵy turaqty jáne qaýipsiz júk tasymalyn qamtamasyz etýdegi róliniń artyp kele jatqanyn aıtty.
Damen Shipyards Group kompanııasymen keme jasaý salasyndaǵy ónerkásiptik kooperatsııa men yntymaqtastyq perspektıvalary talqylandy. Kezdesý qorytyndysy boıynsha tehnologııalardy tartý, óndiristi jergiliktendirý jáne kadrlyq áleýetti damytý arqyly Mańǵystaý oblysynda keme jasaý jáne keme jóndeý klasterin qurý jónindegi jobany iske asyrýǵa baǵyttalǵan Ózara túsinistik týraly memorandýmǵa qol qoıyldy.
Sonymen qatar, Axia Seeds jáne DENSO AgriTech Solutions kompanııalarymen zamanaýı agrotehnologııalardy engizýge, tuqym sharýashylyǵyn damytýǵa jáne jylyjaı sharýashylyǵy salasynda ınvestıtsııalyq jobalardy iske asyrýǵa arnalǵan kezdesýler ótti.
Sapar qorytyndysy boıynsha taraptar saýda-ekonomıkalyq jáne ınvestıtsııalyq yntymaqtastyqty odan ári keńeıtýge múddeliligin rastady. Ózara is-qımyldyń basym baǵyttary retinde aýyl sharýashylyǵy, logıstıka, strategııalyq mańyzdy mıneraldyq resýrstar, ınnovatsııalyq tehnologııalar jáne halyqaralyq saýda aıqyndaldy.
Buǵan deıin Qazaqstan men Nıderland arasyndaǵy saýda 6,3 mlrd dollarǵa jetkenin jazdyq.
