Qazaqstan men Nıderland arasyndaǵy saýda 6,3 mlrd dollarǵa jetti
ASTANA. KAZINFORM —
QR Saýda jáne ıntegratsııa mınıstri Arman Shaqqalıev Nıderland Koroldiginiń Qazaqstan Respýblıkasyndaǵy Tótenshe jáne Ókiletti Elshisi Nıko Shermerspen kezdesti. Bul týraly vedomstvonyń baspasóz qyzmeti málim etti.
Kelissózderdiń negizgi taqyryby bıylǵy maýsym aıyna josparlanyp otyrǵan Qazaqstannyń Nıderlandyǵa alǵashqy saýda-ekonomıkalyq mıssııasyna daıyndyq máselesi boldy. Taraptar aldaǵy mıssııa eki el arasyndaǵy iskerlik baılanystardy keńeıtýdegi mańyzdy qadam bolatynyn atap ótti. Sonymen qatar Qazaqstanda eki eldiń bıznes qaýymdastyqtary men salalyq kompanııalarynyń qatysýymen ekijaqty bıznes-forým ótkizý jospary da talqylandy.
— Taraptar Qazaqstan men Nıderland arasyndaǵy saýda-ekonomıkalyq yntymaqtastyqtyń qazirgi ahýaly men ony odan ári damytý perspektıvalaryn talqylady. Ásirese ınvestıtsııalyq áriptestik, logıstıka, agroónerkásiptik keshen jáne tsıfrlyq ekonomıka salalaryndaǵy ózara is-qımyldy keńeıtý máselelerine erekshe nazar aýdaryldy, — delingen habarlamada.
Kezdesý barysynda Arman Shaqqalıev Nıderlandynyń Qazaqstannyń Eýropadaǵy negizgi ári senimdi seriktesteriniń biri ekenin atap ótti. Onyń aıtýynsha, ekijaqty qatynastar saýda jáne ınvestıtsııa baǵyttarynda turaqty oń dınamıka kórsetip keledi.
— Byltyrǵy jyldyń qorytyndysy boıynsha eki el arasyndaǵy ózara saýda kólemi 6,3 mlrd AQSh dollaryna jetip, 11%-dan astam ósken. Al Qazaqstannyń Nıderlandyǵa eksporty 5,9 mlrd AQSh dollarynan asty, — delingen vedomstvonyń habarlamasynda.
Kelissózder barysynda praktıkalyq yntymaqtastyqty keńeıtýge basymdyq berildi. Qazaqstan tarapy agrotehnologııalar, aýyl sharýashylyǵy ónimderin qaıta óńdeý, Azııa men Eýropany baılanystyratyn zamanaýı logıstıkalyq baǵyttardy damytý, sondaı-aq qazaqstandyq ónimderdi eýropalyq naryqqa ilgeriletý baǵyttarynda birlesken jobalardy júzege asyrýǵa joǵary áleýet bar ekenin atap ótti.
Sonymen qatar taraptar eki eldiń bıznes qaýymdastyqtary arasyndaǵy tikeleı baılanystardy nyǵaıtýdyń mańyzdylyǵyna toqtaldy. Saýda jáne ıntegratsııa mınıstrliginiń málimetinshe, aldaǵy saýda-ekonomıkalyq mıssııa jańa seriktestik baılanystar ornatýǵa, birlesken jobalardy talqylaýǵa jáne qazaqstandyq kompanııalardyń Nıderland naryǵyndaǵy qatysýyn keńeıtýge múmkindik beredi.
Kezdesý qorytyndysy boıynsha taraptar strategııalyq áriptestikti odan ári damytýǵa ózara múddeli ekenin rastady. Sondaı-aq Qazaqstannyń Nıderlandqa alǵashqy saýda-ekonomıkalyq mıssııasy ekijaqty saýda men ınvestıtsııalyq yntymaqtastyqty keńeıtýge, sondaı-aq iskerlik baılanystardy nyǵaıtýǵa jańa serpin beretinine senim bildirdi.
Buǵan deıin Qazaqstan men Nıderlandy arasyndaǵy taýar aınalymy 6 aıda 2,5 mlrd dollarǵa jetkenin jazdyq.
