Qazaqstan men Mońǵolııanyń taýar aınalymyn 500 mln dollarǵa jetkizemiz – Battsetseg
ULANBATYR. KAZINFORM – Qazaqstan men Mońǵolııanyń Syrtqy ister mınıstrleri kólik-logıstıka salasyndaǵy kedergiler men qıyndyqtardy joıý, jańa kólik baǵyttaryn qurý, áýe reısteriniń sanyn arttyrý, azamattar arasyndaǵy ózara sapar aǵynyn kóbeıtý, ımport pen eksport kólemin ulǵaıtý, sondaı-aq kásipkerler úshin qolaıly iskerlik orta qalyptastyrý baǵytynda birlesken jumys júrgizýge ýaǵdalasty, dep habarlaıdy Kazinform tilshisi.
− Bul sapar biregeı oqıǵa, sebebi bul Qazaqstannyń syrtqy ister mınıstriniń 2006 jyldan bergi, ıaǵnı sońǵy 19 jyl ishindegi alǵashqy resmı sapary. 2024 jyly Qazaqstan Prezıdenti Qasym-Jomart Toqaevtyń Mońǵolııaǵa jasaǵan sapary sátti ótkenin jáne eki el arasyndaǵy qatynastar jańa deńgeıge kóterilgenin atap ótkenimiz jón. Memlekettik sapar aıasynda Mońǵolııa men Qazaqstan arasyndaǵy yntymaqtastyqty nyǵaıtýǵa baǵyttalǵan úkimetaralyq qujattarǵa qol qoıyldy, − dedi Batmýnhıın Battsetseg Mońǵolııa Syrtqy ister mınıstrliginde ótken brıfıngte.
Onyń aıtýynsha, búgingi syrtqy ister mınıstrleri arasyndaǵy resmı kelissózder iskerlik jáne syndarly atmosferada ótti. Kelissózder barysynda eki el basshylary qol jetkizgen ýaǵdalastyqtardyń júzege asyrylý barysy talqylanǵan.
Sondaı-aq, Mońǵolııa men Qazaqstan arasyndaǵy strategııalyq seriktestikti aldaǵy jyldary keńeıtý jáne damytý máseleleri boıynsha pikir almasqan.
− Ortalyq Azııa elderimen, sonyń ishinde Qazaqstanmen ózara qatynastardy keńeıtý jáne damytý aıasynda joǵary jáne asa joǵary deńgeıdegi ekijaqty kelissózderdiń turaqtylyǵyn arttyrýǵa kelistik. Elderimizdiń ózara tıimdi ekonomıkalyq yntymaqtastyqty jandandyrý úshin zor áleýetine súıene otyryp, barlyq salada birlesken jumysty jandandyrýǵa ýaǵdalastyq. Mysaly, memleket basshylary qol jetkizgen ýaǵdalastyqtarǵa sáıkes, taýar aınalymyn 500 mıllıon AQSh dollaryna deıin arttyrý múmkindikteri men resýrstary talqylandy, − dedi mońǵolııalyq mınıstr.
Osy oraıda ekijaqty saýda aıasynda taýarlar men ónimder nomenklatýrasyn keńeıtý, sondaı-aq aýyl sharýashylyǵy salasyndaǵy birlesken jobalardy júzege asyrý máseleleri talqylanǵan.
Sonymen birge, eki el arasyndaǵy ekijaqty qatynastardyń sımvolyna aınalýy múmkin birlesken jobalardy qoldaý jáne olardy iske asyrý múmkindikterin zertteý qajettigi jóninde ortaq pikir qalyptasty. Bul jobalar Mońǵolııanyń tabıǵı resýrstary, jún jáne bylǵary ónerkásibi negizinde júzege asyrylýy múmkin.
− Saýda-ekonomıkalyq, ǵylymı, mádenı jáne tehnıkalyq yntymaqtastyq jónindegi qazaqstandyq úkimetaralyq komıssııanyń jumysy belsendi damyp keledi, ári osy mehanızmdi tıisti máselelerdi talqylaý úshin tıimdi paıdalanýdy josparlap otyrmyz. Ekijaqty áriptestikti keńeıtý aıasynda kólik-logıstıka salasyndaǵy kedergiler men qıyndyqtardy joıý, jańa kólik baǵyttaryn qurý, áýe reısteriniń sanyn arttyrý, azamattar arasyndaǵy ózara saparlar aǵynyn kóbeıtý, ımport pen eksport kólemin ulǵaıtý, sondaı-aq kásipkerler úshin qolaıly iskerlik orta qalyptastyrý baǵytynda birlesken jumys júrgizý týraly kelisimge qol jetkizildi, − dedi Batmýnhıın Battsetseg.
Týrızm, mádenıet jáne bilim berý salalarynda is-sharalar ótkizý, sondaı-aq kóshpendi mádenıetke negizdelgen dástúrlerdi saqtaý jóninde de ýaǵdalastyqqa qol jetkizildi.
− Tabıǵatty jáne qorshaǵan ortany qorǵaý salasyndaǵy ulttyq bastamalarǵa sáıkes, Qazaqstan men Mońǵolııa birlesken jumysty jalǵastyrý qajettigi jóninde ortaq ustanymda. Elderimiz BUU qurylymdary men basqa da halyqaralyq uıymdar aıasynda árdaıym belsendi yntymaqtasyp, bir-birin qoldap keledi. Biz bul baǵyttaǵy ustanymymyzdy saqtaı otyryp, strategııalyq seriktestik deńgeıinde yntymaqtastyqty keńeıtý baǵytyndaǵy jumysymyzdy jalǵastyrý nıetimizdi rastaımyz, − dedi Mońǵolııanyń Syrtqy qatynastar mınıstri.
Aıta keteıik, búgin Mońǵolııa Syrtqy ister mınıstriniń shaqyrýymen QR Premer-mınıstriniń orynbasary – Syrtqy ister mınıstri Murat Nurtileý Ulanbatyrǵa resmı saparmen keldi. Eki eldiń mınıstrleri kelissózder júrgizip, Qazaqstan men Mońǵolııa arasyndaǵy qarym-qatynastardyń qaı baǵytta órbıtini jóninde málimdeme jasady.
Sonymen birge, osy resmı sapar aıasynda Mońǵolııadaǵy qazaq dıasporasyna qazaq aqyn-jazýshylarynyń 5 myń dana kitaby jetkizildi.