Qazaqstan men Mońǵolııa saýda kólemin $500 mln-ǵa jetkizýdi josparlap otyr
ASTANA. KAZINFORM - Qazaqstan men Mońǵolııa ózara saýda kólemin 500 mln AQSh dollaryna deıin jetkizýdi josparlap otyr. Bul týraly Aýyl sharýashylyǵy mınıstri Aıdarbek Saparov pen Mońǵolııa Premer-mınıstriniń orynbasary Nıamtaıshır Nomtoıbaıardyń kezdesýinde aıtyldy.
QR Aýyl sharýashylyǵy mınıstrligi baspasóz qyzmetiniń habarlaýynsha, kezdesýde eki el arasyndaǵy saýda-sattyqty ulǵaıtýdyń basym baǵyttary talqylandy. Atap aıtqanda, aýyl sharýashylyǵy jáne azyq-túlik ónimderiniń eksportyn arttyrý, saýdadaǵy taýar túrlerin kóbeıtý, ónimdi qaıta óńdeýdi damytý jáne birlesken óndiris oryndaryn ashý máseleleri qaraldy.
2025 jyly eki el arasyndaǵy taýar aınalymy 7,7 paıyzǵa ósip, 133,5 mln AQSh dollaryn qurady. Onyń ishinde Qazaqstannyń Mońǵolııaǵa eksporty 123 mln dollarǵa, al ımport kólemi 10,5 mln dollarǵa jetti.
Aıdarbek Saparovtyń aıtýynsha, Mońǵolııa naryǵyna otandyq ónimderdi kóbirek shyǵarý arqyly ekijaqty saýda kólemin arttyrýdyń áleýeti zor.
-Mońǵolııamen saýda-sattyqty, eń aldymen, otandyq ónimderdiń jetkizilimin ulǵaıtý arqyly arttyrýǵa múmkindik bar. Bizdiń maqsatymyz – eksport kólemin kóbeıtip qana qoımaı, turaqty áriptestik ornatyp, ónimdi qaıta óńdeý men birlesken jobalardy damytý. Osy baǵyttaǵy júıeli jumys eki el arasyndaǵy saýda kólemin edáýir arttyrýǵa jol ashady, – dedi mınıstr.
Qazaqstan tarapy Mońǵolııaǵa eksportty arttyrýdyń negizgi baǵyttarynyń biri retinde aýyl sharýashylyǵy ónimderin qarastyryp otyr. Atap aıtqanda, astyq jáne odan daıyndalatyn ónimder, ósimdik maıy, kúrish, jemis-jıdek pen kókónis, sondaı-aq aýyl sharýashylyǵy tehnıkasyn jetkizý kólemin ulǵaıtýǵa múmkindik bar.
Sonymen qatar endigi jerde tek dástúrli taýarlardyń eksportyn kóbeıtýge emes, óńdelgen jáne qosylǵan quny joǵary ónimderdiń úlesin arttyrý kózdeledi.
Osyǵan baılanysty daıyn azyq-túlik ónimderin Mońǵolııa naryǵyna kóbirek shyǵarý, sondaı-aq aýyl sharýashylyǵy shıkizatyn birlesip óńdeıtin kásiporyndar qurý múmkindigi qarastyrylýda.
Al Nıamtaıshır Nomtoıbaıar Qazaqstan men Mońǵolııa arasyndaǵy ekonomıkalyq baılanystardy odan ári jandandyrý mańyzdy ekenin atap ótti.
Onyń pikirinshe, eki el kásipkerleriniń baılanysyn kúsheıtip, kólik jáne logıstıka salasyndaǵy múmkindikterdi keńeıtý qajet. Sonymen qatar jańa saýda jáne ınvestıtsııalyq jobalardy júzege asyrýǵa qolaıly jaǵdaı jasaýǵa basymdyq berilmek.
-Qazaqstan men Mońǵolııa arasyndaǵy ekonomıkalyq baılanystardyń qarqynyn arttyryp, naqty nátıjege baǵyttalǵan yntymaqtastyqty damytýǵa múddelimiz. Ol úshin kásipkerler arasyndaǵy tikeleı baılanysty kúsheıtip, kólik-logıstıkalyq múmkindikterdi keńeıtý jáne jańa kommertsııalyq jobalardy iske asyrýǵa jaǵdaı jasaý qajet. Kásipkerlerdiń tikeleı aralasýy arqyly ekijaqty yntymaqtastyqtyń jańa múmkindikterin asha alamyz, – dedi Nıamtaıshır Nomtoıbaıar.
Eki el arasyndaǵy saýda-ekonomıkalyq baılanystardyń damýyna 2026 jylǵy 22 shildede kúshine engen Eýrazııalyq ekonomıkalyq odaq pen Mońǵolııa arasyndaǵy ýaqytsha saýda kelisimi de yqpal etpek.
Kezdesý sońynda taraptar ózara taýar jetkizilimin arttyrýǵa, kásipkerler arasyndaǵy baılanysty nyǵaıtýǵa jáne eki eldiń saýda aınalymyn odan ári keńeıtetin jańa jobalardy júzege asyrýǵa nıetti ekenderin jetkizdi.
Osyǵan deıin Mońǵolııada qazaqstandyq eksportty qoldaıtyn Seriktestik keńsesi ashylatyny týraly jazdyq.
