Qazaqstan men Mońǵolııa saýda aınalymyn bes ese ulǵaıtýdy kózdep otyr
ASTANA. KAZINFORM — Qazaqstan men Mońǵolııa kólik, energetıka jáne aýyl sharýashylyǵy salalaryndaǵy yntymaqtastyqty talqylady, dep habarlaıdy Úkimettiń baspasóz qyzmeti.
QR Premer-mınıstriniń birinshi orynbasary Nurlybek Nálibaevtyń Qazaqstan men Mońǵolııa arasyndaǵy saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi úkimetaralyq komıssııanyń onynshy otyrysyna qatysýǵa arnaıy kelgen Mońǵolııa Premer-mınıstriniń orynbasary N. Nomtoıbaıarmen kezdesti.
Kezdesý barysynda Nurlybek Nálibaev Qazaqstan men Mońǵolııanyń strategııalyq seriktestigi praktıkalyq yntymaqtastyqty keńeıtý jáne úkimetaralyq turaqty dıalogti qoldaý úshin senimdi negiz bolyp otyrǵanyn atap ótti.
— Biz mańyzdy saýda seriktesimiz Mońǵolııamen yntymaqtastyqty jan-jaqty damytýǵa erekshe nazar aýdaramyz, — dedi Qazaqstan Respýblıkasy Premer-mınıstriniń birinshi orynbasary.
Ol ózara saýda kólemin odan ári arttyrýdyń jáne memleket basshylarynyń ekijaqty saýda kólemin bes ese ulǵaıtý týraly kelisimine qol jetkizýdiń mańyzdylyǵyn atap ótti.
Bıyl sáýir aıynda Mońǵolııa Prezıdenti Ý. Hýrelsýhtyń Astanaǵa jasaǵan memlekettik sapary barysynda qol jetkizilgen ýaǵdalastyqtardy tolyqqandy júzege asyrý qajettigi aıtyldy.
Taraptar saýda, energetıka, atom, tsıfrlyq, qarjy, mádenı-gýmanıtarlyq salalardaǵy joǵary deńgeıdegi negizgi ýaǵdalastyqtardy ilgeriletý úshin eki Úkimettiń kúsh-jigerin jandandyrý qajettigine kelisti.
Áriptestiktiń aıtarlyqtaı áleýeti aýyl sharýashylyǵy men taý-ken sektorynda, ken oryndaryn barlaý men ıgerý, mıneraldyq shıkizattardy óńdeý jobalarynda shoǵyrlanǵanyn atap ótti.
Bul rette taraptar taýar aınalymy ósýiniń basty sharttarynyń biri sanalatyn elder arasyndaǵy kólik-logıstıkalyq ınfraqurylymdy damytýdyń mańyzdylyǵyna da nazar aýdardy.
Taraptar bıylǵy maýsym aıynan bastap qos el astanasy arasyndaǵy tikeleı áýe qatynasynyń ashylǵanyn atap ótip, qosymsha áýe baǵyttaryn iske qosý múmkindigin talqylady.
Kezdesý sońynda Qazaqstan men Mońǵolııa arasyndaǵy buǵan deıin qol jetkizilgen kelisimderdi júzege asyrýǵa jáne birlesken jobalardy ilgeriletý jóninde belsendi jumys isteýge kelisti.
Budan buryn Qazaqstan men Mońǵolııa ózara saýda kólemin 500 mln AQSh dollaryna deıin jetkizýdi kózdep otyrǵanyn jazǵanbyz.
