Qazaqstan men Mońǵolııa ózara taýar aınalymyn 500 mln dollarǵa jetkizedi
ASTANA. KAZINFORM — Qazaqstan men Mońǵolııa ózara taýar aınalymyn 500 mln dollarǵa jetkizedi. Bul týraly Aqordada Mońǵolııa Prezıdenti Ýhnaagıın Hýrelsúhpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
— Jalpy, sapar barysynda birqatar mańyzdy qujatqa qol qoıyldy. Búgin jasalǵan kelisimder eki eldiń alys-berisin jandandyra túsetini sózsiz. Qazaqstan men Mońǵolııa arasyndaǵy saýda-sattyq kólemi byltyr 130 mln dollar bolyp, 7,7 paıyzǵa ósti. Elderimizdiń ekonomıkalyq áleýetin eskersek, bul kórsetkishti arttyrýǵa tolyq múmkindigimiz bar. Osy oraıda aldaǵy birneshe jylda taýar aınalymyn 500 mln dollarǵa jetkizý jóninde meje qoıyp otyrmyz. Ol úshin eń aldymen saýda-sattyqtaǵy taýar túrin keńeıtýimiz kerek. Ekonomıkalyq yqpaldastyqty tejeıtin kedergilerdi barynsha azaıtý qajet, — dedi Memleket basshysy.
Prezıdent osydan 1 aı buryn Qazaqstannyń saýda mıssııasy Mońǵolııaǵa arnaıy saparmen barǵanyn atap ótti.
— Onda ekonomıkalyq baılanystardy ártaraptandyrýǵa qatysty mańyzdy usynystar jasaldy. Biz byltyr Eýrazııa ekonomıkalyq odaǵy men Mońǵolııa arasyndaǵy ýaqytsha saýda kelisimin maquldadyq, ratıfıkatsııaladyq. Bul qujat elderimiz úshin kóptegen tyń múmkindikke jol ashady, — dedi Qasym-Jomart Toqaev.
Buǵan deıin Qasym-Jomart Toqaev Aqordada Mońǵolııa Prezıdentin qarsy alǵanyn jazǵan edik.
