Qazaqstan men Mońǵolııa medıa saladaǵy yntymaqtastyqty nyǵaıtady
ASTANA. KAZINFORM — Mońǵolııa Prezıdenti Ýhnaagıın Hýrelsýh Qazaqstanǵa memlekettik sapary aıasynda eki eldiń iri medıaholdıngteri arasynda ózara túsinistik jáne yntymaqtastyq týraly memorandýmǵa qol qoıyldy.
Qujatqa QR Prezıdenti Teleradıokesheniniń bas dırektory Raýshan Qajybaeva jáne Mońǵolııanyń Ulttyq qoǵamdyq radıo jáne teledıdary (MNB) bas dırektory Gerel Ganhýıag qol qoıdy.
Atap aıtqanda, memorandým medıa saladaǵy áriptestikti damytýǵa negiz qalaıdy. Taraptar birqatar mańyzdy baǵyttar boıynsha ózara is-qımyldy kúsheıtýge ýaǵdalasty.
— Medıa kontent almasý, birlesken jobalar óndirý, mamandardyń taǵylymdamadan ótýi men biliktiligin arttyrý, sondaı-aq medıa ónimderdi ulttyq jáne halyqaralyq deńgeıde ilgeriletý kózdelgen, — delingen habarlamada.
Budan bólek, qujatta onlaın-platformalar, áleýmettik jeliler jáne mýltımedıalyq ónimderdi qamtıtyn zamanaýı tsıfrlyq formattar boıynsha yntymaqtastyqty damytý qarastyrylǵan.
Sondaı-aq eki eldiń týrıstik, mádenı jáne ekonomıkalyq áleýetin tanytýǵa baǵyttalǵan birlesken medıajobalarǵa erekshe mán berilgen.
Aıta keteıik, QR Prezıdentiniń teleradıokesheni — Memleket basshysynyń qyzmetin aqparattyq turǵyda qamtamasyz etetin iri medıa qurylym. Onyń quramyna «Jibek Joly» telearnasy men radıosy, Derekti kıno ortalyǵy, sondaı-aq alty tilde aqparat taratatyn «Kazinform» halyqaralyq aqparat agenttigi kiredi.
Al Mońǵolııanyń Ulttyq qoǵamdyq radıo jáne teledıdary (MNB) — eldegi jalǵyz qoǵamdyq habar taratýshy ári eń iri medıakompanııa. Onyń quramynda alty telearna, onyń ishinde táýlik boıy habar taratatyn MNB News aqparattyq arnasy, sondaı-aq tórt radıostantsııa bar. Sonyń ishinde jeti tilde habar taratatyn «Mońǵolııa daýysy» radıosy jumys isteıdi. Budan bólek, kompanııanyń jekelegen baǵdarlamalary qazaq tilinde de daıyndalady.
Eske sala keteıik, Prezıdent teleradıokesheni Serbııanyń jetekshi aqparat quraldarymen seriktes atanǵan edi.
