Qazaqstan men Mońǵolııa energetıka salasyndaǵy yntymaqtastyqty damytý máselelerin talqylady
ASTANA.KAZINFORM — Energetıka mınıstri Erlan Aqkenjenov Mońǵolııanyń Ónerkásip jáne mıneraldyq resýrstar mınıstri Gongoryn Damdınnıammen kezdesý ótkizdi.
Kelissózder barysynda taraptar energetıka salasyndaǵy yntymaqtastyqty keńeıtý perspektıvalaryn, atap aıtqanda qazaqstandyq munaı men munaı ónimderin jetkizý boıynsha yntymaqtastyq múmkindikterin zerdeleýdi, sondaı-aq geologııalyq barlaý jáne munaı óndirý salasyndaǵy tájirıbe almasýdy talqylady.
Kómir ónerkásibi men kómir hımııasyn damytýǵa, onyń ishinde kómirdi tereń óńdeý jobalaryna erekshe nazar aýdaryldy. Sonymen qatar jańartylatyn energııa kózderi salasyndaǵy ózara is-qımyl múmkindikteri qarastyryldy.
Kezdesý qorytyndysy boıynsha taraptar energetıka sektoryn turaqty damytýǵa baǵyttalǵan birlesken jobalardy iske asyrý jáne ekijaqty yntymaqtastyqty nyǵaıtýǵa múddelilik bildirdi.
Aıta ketelik 20-23 sáýirde Mońǵolııa Prezıdenti Ýhnaagıın Húrelsúh Qazaqstanǵa memlekettik saparmen keledi.
