Qazaqstan men Mońǵolııa arasyndaǵy áýe reısi qaıta jandanady
ALMATY. 16 naýryz . QazAqparat - Aǵymdaǵy jyldyń 11 sáýiri kúni Mońǵolııa men Qazaqstan arasyndaǵy áýe qatynasy qaıta jandanbaq.
Bul kúni Baıan Ólgeıden shyqqan alǵashqy ushaq tikeleı Almatyǵa kelip qonǵaly otyr.
Qazaqstan men Mońǵolııa arasyndaǵy áýe qatynasyn 2000-2011 jyldary qazaqstandyq «Skat» áýe kompanııasy júzege asyryp kelgen edi. 30 adamdyq eski «An-24» ushaǵynyń qaýipsizdigine depýtattar Parlament qabyrǵasynda alańdaýshylyq bildirgen soń, byltyr áýe kompanııasy ony aýystyratyn ózge ushaǵy bolmaı, reısti toqtatqan bolatyn.
«Biz ony qaıta jandandyrý úshin Mońǵolııanyń «Izımıst» áýe kompanııasymen kelisimshart jasastyq. Endi ár sensenbi saıyn Baıan Ólgeıden Almatyǵa jáne Almatydan Baıan Ólgeıge 90 adamdyq jańa ushaq qatynaıtyn bolady. Buryn «Skat» kompanııasynyń ushaǵy Almatydan Óskemenge deıin 1,5 saǵat, al Óskemenen Baıan Ólgeıge 2 saǵat ushatyn», - deıdi «QazServısAvıa» kompanııasynyń dırektory Aqtanberdi Genden.
Onyń aıtýynsha, buryn eski ushaqpen Óskemen arqyly qatynaıtyn jolaýshylar bıletke 39 myń 46 teńge tóleıtin. Endi tike qatynaıtyn jańa ushaqtyń bılet baǵasy 47 myń teńge kóleminde bolǵaly otyr. Eger kórshiles Ózbekstan men Qyrǵyzstanda Mońǵolııaǵa qatynaıtyn áýe reısi joq ekenin eskersek, qyzmeti qaıta jandanǵan bul baǵyttaǵy ushaq óz jolaýshylaryn tabatyny kúmánsiz.
