Qazaqstan men Mońǵolııa arasyndaǵy jol qashyqtyǵy 800 shaqyrymǵa deıin qysqarady
ULANBATYR. KAZINFORM – Qazaqstan men Mońǵolııa kólik jáne logıstıka salasyndaǵy yntymaqtastyqty nyǵaıtýǵa nıetti. QR Premer-mınıstriniń orynbasary – Syrtqy ister mınıstri Murat Nurtileý Mońǵolııaǵa jasaǵan resmı saparynda osy eldiń Joldar jáne kólik mınıstri Borhýýgıın Delgersaıhanmen kezdesti.
Taraptar Qazaqstan men Mońǵolııanyń tyǵyz geografııalyq baılanysyna nazar aýdaryp, temirjol jáne avtokólik, azamattyq avıatsııa, sondaı-aq avtojol ınfraqurylymyn damytý sııaqty ózekti yntymaqtastyq baǵyttaryn talqylady.
− Ásirese mınıstrler «Qazaqstan-Reseı-Mońǵolııa» avtojolyn salý jobasyna erekshe nazar aýdardy. Bul joba eki el arasyndaǵy jol qashyqtyǵyn 800 shaqyrymnan astamǵa qysqartyp, ózara taýar aınalymyn 500 mln AQSh dollaryna deıin ulǵaıtýǵa múmkindik beredi, − dep jazylǵan QR Syrtqy ister mınıstrliginiń habarlamasynda.
Avtomobıl jáne temirjol júk tasymaly salalaryndaǵy oń dınamıka baıqalady. Kezdesýde qazaqstandyq astyq jáne maıly daqyldar, sondaı-aq lokomotıvter men jolaýshylar vagondaryn qosa alǵanda kólik mashına jasaý ónimderin jetkizý arqyly eksporttyq-ımporttyq tasymaldardy arttyrý máselesi de talqylandy.
Qazaq tarapy birlesken jobalardy iske asyrý Mońǵolııaǵa Transkaspıı halyqaralyq kólik baǵdaryna jáne Qazaqstan aýmaǵy arqyly ótetin iri eýrazııalyq logıstıkalyq dálizderge shyǵýǵa múmkindik beretinin jetkizdi.
Sonymen birge, eki el mınıstrleri bıylǵy shilde aıynda Qytaıda Qazaqstan, Mońǵolııa jáne Reseı kólik mınıstrleriniń úshjaqty kezdesýin ótkizýge daıyn ekendikterin rastady.
Azamattyq avıatsııa salasynda taraptar Astana-Ólgıı-Ulan-Batyr baǵytyndaǵy tikeleı reıster geografııasyn keńeıtýge daıyn ekenin aıtty. Bul iskerlik jáne gýmanıtarlyq baılanystardyń damýyna yqpal etetin bolady.
Aıta keteıik, keler jyly Mońǵolııa prezıdenti Ýhnaagıın Hýrelsýh Qazaqstanǵa saparmen keledi.
Qazaqstan men Mońǵolııanyń Syrtqy ister mınıstrleri kólik-logıstıka salasyndaǵy kedergiler men qıyndyqtardy joıý, jańa kólik baǵyttaryn qurý, áýe reısteriniń sanyn arttyrý, azamattar arasyndaǵy ózara sapar aǵynyn kóbeıtý, ımport pen eksport kólemin ulǵaıtý, sondaı-aq kásipkerlerge qolaıly iskerlik orta qalyptastyrý baǵytynda birlesken jumys júrgizýge ýaǵdalasty.
Resmı sapar aıasynda Mońǵolııadaǵy qazaq dıasporasyna 5 myń dana kitap jetkizildi.
Keshe Syrtqy ister mınıstri Murat Nurtileý Mońǵolııa prezıdenti Ýhnaagıın Hýrelsýhtyń qabyldaýynda boldy.