Qazaqstan men Mońǵolııa arasyndaǵy saýda kólemi artyp keledi
ASTANA. KAZINFORM – Qazaqstan men Mońǵolııa ózara saýda kólemin 500 mln AQSh dollaryna deıin jetkizýdi kózdep otyr. Bul týraly búgin Astanada ótken Qazaqstan-Mońǵolııa úkimetaralyq komıssııasynyń 10-otyrysynda aıtyldy.
2025 jyly eki el arasyndaǵy taýar aınalymy 7,7%-ǵa ósip, 133,5 mln AQSh dollaryn qurady. Qazaqstannyń Mońǵolııaǵa eksporty 123 mln dollarǵa jetti. Al ımport kólemi 10,5 mln dollar boldy.
Ásirese, eldegi aýyl sharýashylyǵy ónimderine suranys joǵary. 2025 jyly agroónerkásiptik ónimderdiń taýar aınalymy 32%-ǵa ósip, 29,9 mıllıon AQSh dollaryn quraǵan. Onyń 28 mıllıon dollary Qazaqstan eksporty. Ósim bıyl da jalǵasty. Alǵashqy jeti aıda agroónerkásiptik keshen ónimderiniń taýar aınalymy taǵy 11%-ǵa artyp, 15,3 mıllıon AQSh dollaryna jetti.
- Jeńil ónerkásip salasynda da Mońǵolııanyń mańyzdy seriktes retinde qarastyramyz. Endi jaı ǵana taýar satýmen shektelmeı, birlesken óndiristi damytý qajet.Mońǵolııanyń sapaly shıkizaty men Qazaqstannyń óndiristik múmkindigin biriktirip, daıyn ári quny joǵary ónim shyǵarýǵa daıynbyz, - dedi QR Aýyl sharýashylyǵy mınıstri Aıdarbek Saparov.
Taraptar saýda qarqynyn saqtap, ózara jetkiziletin taýar túrlerin kóbeıtýdi kózdeıdi. Buǵan qosa, taý-ken ónerkásibi men logıstıka salalaryndaǵy birlesken jobalardy damytý máseleleri talqylandy.
-Mońǵolııa Qazaqstanmen qarym-qatynasty damytýǵa úlken mán beredi. Saýda, kólik, ınvestıtsııa jáne ónerkásip salalarynda áleýet joǵary. Eń bastysy – úkimetaralyq komıssııa jumysy naqty nátıjege baǵyttalyp, eki eldiń bıznesine jańa múmkindikter ashýy kerek, - dedi Mońǵolııa Premer-mınıstriniń orynbasary Nıamtaıshır Nomtoıbaıar.
Eki el arasyndaǵy saýda-ekonomıkalyq baılanystardyń damýyna 2026 jylǵy 22 shildede kúshine engen Eýrazııalyq ekonomıkalyq odaq pen Mońǵolııa arasyndaǵy ýaqytsha saýda kelisimi de yqpal etpek.
Aıta keteıik, jaqynda Mońǵolııada qazaqstandyq eksportty qoldaıtyn Seriktestik keńsesi ashylady.
