Qazaqstan men Mońǵolııa arasyndaǵy saýda aınalymy eki ese ósedi

ASTANA. KAZINFORM — Qos memlekettiń jan-jaqty seriktestigi qarqyndy kúsheıip keledi. Bul jóninde Qazaqstannyń Syrtqy saýda palatasynyń basqarma tóraǵasy Murat Qarymsaqov Qazaqstan-Mońǵolııa bıznes forýmynda málimdedi. 

— Byltyr eki el arasyndaǵy saýda aınalymy 140 mln dollarǵa jýyqtady. Jyl saıyn qarym-qatynasymyz damyp keledi. Búgingi bıznes forýmǵa qos memleketten kóptegen kompanııa ókilderi qatysyp jatyr. Sondyqtan aldaǵy ýaqytta saýda aınalymy eki esege ulǵaıýy múmkin, — dedi ol jýrnalısterge suhbat bere otyryp.

Sonymen qatar, Murat Qarymsaqov qos memlekettiń bir-birine salǵan ınvestıtsııasyna toqtaldy.

— 2025 jyly Qazaqstan Mońǵolııa ekonomıkasyna 50 mln dollar shamasynda tikeleı ınvestıtsııa quıdy. Al Mońǵolııa tarapynyń elimizge salǵan ınvestıtsııasy 7 mln dollar boldy, — dedi ol.

Aıta keteıik, buǵan deıin Qazaqstan mal aýrýyna qarsy vaktsınalaryn Mońǵolııaǵa jetkizýge múddeli ekenin jazǵanbyz.