Qazaqstan men Mońǵolııa arasyndaǵy yntymaqtastyqty nyǵaıtýǵa múddelimiz — Máýlen Áshimbaev
ASTANA. KAZINFORM – Senat Tóraǵasy Máýlen Áshimbaev Mońǵolııanyń Qazaqstandaǵy Elshisi Dorj Baıarhýýmen kezdesti. Suhbat barysynda taraptar parlamentaralyq yntymaqtastyqty odan ári nyǵaıtý jáne eki el arasyndaǵy seriktestikti keńeıtý máselelerin talqylady. Bul týraly Senattyń Baspasóz qyzmeti málim etti.
Palata Spıkeri Elshige iltıpat bildire kelip, joǵary deńgeıdegi ózara senimge negizdelgen dıalog Qazaqstan men Mońǵolııa yntymaqtastyǵyn ári qaraı nyǵaıtýdyń negizgi kepili ekenin atap ótti.
Osyǵan baılanysty ol qazirgi tańda halyqaralyq uıymdar aıasynda belsendi damyp kele jatqan eki eldiń parlamentaralyq qarym-qatynasyn arttyrýdyń mańyzy zor ekenine nazar aýdardy.
«Qazaqstan men Mońǵolııa baılanysynyń mańyzdy baǵyttarynyń biri — parlamentaralyq dıalog. Biz aldaǵy ýaqytta Mońǵolııa Memlekettik Uly Hýralymen yntymaqtastyqty odan ári nyǵaıtýǵa múddelimiz. Qazaqstan Parlamentiniń Senatynda Mońǵolııa Parlamentimen yntymaqtastyq jónindegi top quryldy. Memlekettik Uly Hýralda da „Mońǵolııa-Qazaqstan“ dep atalatyn parlamenttik dostyq toby jumys isteıdi. Aldaǵy ýaqytta osy baǵyttaǵy belsendi baılanys Parlamentter arasyndaǵy qarym-qatynasty arttyrýǵa múmkindik beredi jáne zań shyǵarý qyzmetinde tájirıbe almasýǵa jol ashady», — dedi Máýlen Áshimbaev.
Sonymen qatar Senat Tóraǵasy eki el arasynda túrli saladaǵy baılanystar tıimdi damyp kele jatqanyn tilge tıek etti. Kezdesýde saýda-ekonomıkalyq, ınvestıtsııalyq yntymaqtastyq máseleleri de talqylandy.
Máýlen Áshimbaev óz sózinde Memleket basshysy Qasym-Jomart Toqaevtyń bastamasymen Qazaqstanda iske asyrylǵan aýqymdy saıası jańǵyrtýlardyń nátıjelerine toqtalyp ótti.
Kezdesý barysynda Palata Spıkeri rýhanı dıplomatııany damytýdyń mańyzy jóninde de sóz qozǵady. Sondaı-aq ol mońǵol din kóshbasshylary Álemdik jáne dástúrli dinder lıderleri Seziniń maqsattaryna qol jetkizýge eleýli úles qosyp, belsendi qoldaý kórsetip kele jatqanyn aıtyp, sol úshin Dorj Baıarhýýge alǵys bildirdi. Osy rette Mońǵolııa býddıstik hramdarynyń basshylary Forýmnyń mazmunyn arttyrýǵa jáne Sezdiń qorytyndy qujattaryn daıyndaýǵa aıtarlyqtaı úles qosqanyn atap ótken jón.
Óz kezeginde Elshi bizdiń elde júrgizilip jatqan qoǵamdyq-saıası jańǵyrtýlardy joǵary baǵalap, Qazaqstan men Mońǵolııa arasyndaǵy yntymaqtastyqty odan ári nyǵaıtýǵa múddeli ekenin jetkizdi.
