Qazaqstan men Mońǵolııa arasynda salynatyn avtojol qandaı baǵyttardy qamtıdy
ASTANA. KAZINFORM - Qazaqstan Respýblıkasy Kólik mınıstrligi Avtomobıl joldary komıteti tóraǵasynyń orynbasary Maqsat Baıahmet Qazaqstan men Mońǵolııa arasyndaǵy kólik salasyndaǵy yntymaqtastyq týraly kelisimdi talqylaý jónindegi kezdesýge qatysty.
QR Kólik mınıstrligi baspasóz qyzmetiniń habarlaýynsha, kezdesý aıasynda avtojol salasyndaǵy ózara is-árekettiń negizgi máseleleri talqylanyp, memleketter arasynda jańa avtomobıl jolyn salý jaıynda suraqtar pysyqtaldy.
Avtojoldyń jańa baǵyty Mońǵolııa shekarasyna qaraı shyǵatyn Óskemen, Rıdder qalalary jáne Týekta (Reseı Federatsııasy) eldi mekeni arqyly ótpek. Boljamdy jańa marshrýttyń qazaqstandyq ýchaskesi – Óskemen qalasynan Reseı Federatsııasynyń shekarasyna deıingi aralyqta salyndy. Onyń jalpy uzyndyǵy 189 shaqyrym, 62 shaqyrymda kúrdeli jáne ortasha jóndeý jumystary atqarylady. Marshrýttyń basym bóligi Reseı Federatsııasynyń aýmaǵynda ótedi, eger Reseı tarapynyń jol salýǵa kelisimi bolsa, marshrýt 837 shaqyrymdy quraıdy.
Al qazir qoldanystaǵy «Óskemen – Rýbtsovsk – Barnaýl – Týekta avtomobıl joly – Mońǵolııa shekarasy» tasjolynyń uzyndyǵy 1 604 shaqyrymdy quraıdy.
Jańa joldyń qurylysy jol júrý ýaqytyn edáýir qysqartyp, Qazaqstan men Mońǵolııa arasyndaǵy kólik baılanysyn jaqsartyp qana qoımaı, ekonomıkalyq jáne mádenı baılanystardy nyǵaıtýdaǵy mańyzdy qadam bolmaq.
