Qazaqstan men Mońǵolııa arasynda ózara taýar saýdasyna tarıfter alynbaıdy
ASTANA. KAZINFORM — Mońǵolııa bul baǵytta bes memleketpen úshjyldyq kelisim jasasqan. Olardyń ishinde Qazaqstan da bar. Bul jóninde Mońǵolııa prezıdentiniń keńesshisi Baıarsaıhan Djavkhlan Qazaqstan-Mońǵolııa bıznes forýmynda Kazinform tilshisine bergen suhbatynda málimdedi.
— Mońǵolııa prezıdenti Qazaqstanǵa 20 jyldan keıin memlekettik saparmen kelip otyr. Osy sapar aıasynda, eki memlekettiń Úkimetteri 13 kelisimge qol qoıdy. Al bıznes forýmǵa Mońǵolııadan júzge jýyq bıznes ókili keldi. Olar — qurylys, logıstıka, jeńil ónerkásip, azyq-túlik ónerkásibi, energııa t. b. salalarda kásibin dóńgeletip otyrǵan azamattar, — dedi ol.
Sonymen qatar, Mońǵolııa prezıdentiniń keńesshisi eki el arasyndaǵy taýar aınalymy úderisteri jeńildeıtinin atap ótti.
— Mońǵolııa bes memleketpen kelisim jasasyp jatyr. Olar — Qazaqstan, Reseı, Belarýs, Qyrǵyzstan jáne Armenııa. Bul memlekettermen Mońǵolııa arasyndaǵy eksportta da, ımportta da úsh jyl boıy tarıfter alynbaıdy. Bul elderimizdiń arasyndaǵy taýar aınalymyn ósirýge zor yqpal etedi dep oılaımyn, — dedi ol.
Aıta keteıik, osy bıznes forýmda Serik Jumanǵarın da EAEO men Mońǵolııa arasyndaǵy ýaqytsha saýda kelisimine qol qoıylǵanyn málimdegen edi.
