Qazaqstan men Mońǵolııa agrarlyq ǵylym salasynda yntymaqtastyqty kúsheıtedi
ASTANA. KAZINFORM — Mońǵolııa Qazaqstandy agrarlyq saladaǵy mańyzdy ári bolashaǵy zor seriktes retinde qarastyrady, dep habarlaıdy AShM baspasóz qyzmeti.
Aýyl sharýashylyǵy mınıstri Aıdarbek Saparov Mońǵolııa Premer-mınıstriniń orynbasary Nıamtaıshıryn Nomtoıbaıarmen kezdesti.
Kezdesý barysynda agroónerkásip kesheninde ekijaqty yqpaldastyqtyń basym baǵyttary, onyń ishinde ózara saýda, logıstıkalyq ınfraqurylymdy jetildirý, agrarlyq ǵylymdy damytý, sondaı-aq veterınarlyq jáne fıtosanıtarlyq baqylaý salasyndaǵy ózara is-qımyl máselelerine nazar aýdaryldy.
Aıdarbek Saparov Mońǵolııa prezıdenti Ýhnaagıın Hýrelsýhtyń 2026 jylǵy sáýir aıyndaǵy Qazaqstanǵa memlekettik sapary qazaq-mońǵol qatynastarynyń damýyna jańa serpin berip, eki el yntymaqtastyǵyn jańa deńgeıge kótergenin atap ótti.
— Memleket basshylary arasynda qol jetkizilgen kelisimder saýda-ekonomıkalyq baılanystardy nyǵaıtýǵa jáne agrarlyq saladaǵy áriptestikti keńeıtýge múmkindikter ashady. Búginde elderimizdiń aýyl sharýashylyǵy ónimderi boıynsha taýar aınalymy qarqyndy ósip keledi. Bıylǵy jyldyń alǵashqy úsh aıynyń qorytyndysy boıynsha ózara saýda kólemi 10 paıyzǵa artty. Biz astyq, un, kúnbaǵys maıy, kúrish jáne jemis-kókónis ónimderin jetkizý kólemin ulǵaıtýǵa daıynbyz, — dedi mınıstr.
Óz kezeginde Nıamtaıshıryn Nomtoıbaıar da ekijaqty yntymaqtastyqtyń áleýeti zor ekenin jáne osyǵan deıin qol jetkizilgen kelisimderdi is júzinde júzege asyrýdyń mańyzdylyǵyn aıtty.
— Mońǵolııa Qazaqstandy agrarlyq saladaǵy mańyzdy ári bolashaǵy zor seriktes retinde qarastyrady. Bizde saýda men logıstıkadan bastap óńiraralyq seriktestikke deıin ózara múddelerdiń aýqymy keń. Biz taýar aınalymyn arttyrýǵa, turaqty kólik jáne logıstıkalyq tizbekterdi damytýǵa, sondaı-aq óńiraralyq baılanystardy tereńdetýge múddelimiz. Birlesken bastamalardy iske asyrýda júıeli jumys sheshýshi ról atqarady, — dedi ol.
Kezdesý barysynda fıtosanıtarlyq qaýipsizdik pen ósimdikter karantıni máselelerine de erekshe kóńil bólindi. Eki eldiń beıindi vedomstvolary fıtosanıtarlyq jaǵdaı týraly aqparat almasý, karantındik zııandy organızmderdi anyqtaý jáne dıagnostıkalaý boıynsha is-qımyldy úılestirý, sondaı-aq baqylaý salasyndaǵy normatıvtik bazalar men talaptardy úılestirý baǵyttaryn kózdeıtin yntymaqtastyq týraly memorandým jobasyn kelisýdi jalǵastyryp jatyr.
Sondaı-aq taraptar teri men jún óńdeý, agrarlyq ǵylymdy damytý jáne bilim berý baǵdarlamalary salasyndaǵy yntymaqtastyq perspektıvalaryn talqylady.
Qazaqstan tarapy tuqym sharýashylyǵy boıynsha birlesken jobalardy, atap aıtqanda, dándi daqyldar, kartop, kókónis jáne jemis-jıdek daqyldarynyń tuqymyn óndirý baǵyttaryn pysyqtaýdy, sondaı-aq jylqy sharýashylyǵy salasyndaǵy yntymaqtastyqty keńeıtý múmkindigin qarastyrýdy usyndy.
Kezdesý nátıjesinde taraptar agrarlyq saladaǵy seriktestikti odan ári nyǵaıtýǵa daıyn ekenderin jetkizdi jáne ortaq maqsat qos memlekettiń azyq-túlik qaýipsizdigin qamtamasyz etýge ári turaqty damýǵa yqpal etetinine senim bildirdi.
Buǵan deıin Qazaqstan men Mońǵolııa arasynda jańa avtokólik dálizi salynatynyn jazdyq.
