Qazaqstan men Mońǵolııa $62,6 mln-ǵa eksporttyq kelisim jasady
ASTANA. KAZINFORM — Qazaqstan Mońǵolııamen bir kúnde $62,6 mln kóleminde eksporttyq kelisimsharttarǵa qol qoıdy.
Qazaqstandyq kompanııalar Ulan-Batyrdaǵy bıznes-mıssııa barysynda Mońǵolııamen jalpy somasy $62,6 mln bolatyn eksporttyq kelisimsharttarǵa qol qoıdy. Qazaqstan delegatsııasyn Saýda jáne ıntegratsııa birinshi vıtse-mınıstri Aıjan Bıjanova bastap bardy.
— Biz Mońǵolııany eksport úshin óte perspektıvaly naryq dep sanaımyz. Qazirdiń ózinde daıyn ónimderdiń úlesi joǵary, bıznes tarapynan naqty qyzyǵýshylyq bar, — dedi Aıjan Bıjanova Ulan-Batyrdaǵy bıznes-forýmda.
2025 jyldyń qorytyndysy boıynsha eki el arasyndaǵy ımport úsh esege ósken. Mońǵolııaǵa eksporttyń 90%-dan astamy daıyn ónimder, ıaǵnı shıkizat emes taýarlar. Onyń ishinde azyq-túlik pen ónerkásip taýarlary basym. Bul Qazaqstan eksportynyń joǵary qosylǵan quny bar ónimderge aýysyp jatqanyn kórsetedi.
Vıtse-mınıstrdiń aıtýynsha, EAEO men Mońǵolııa arasyndaǵy ýaqytsha saýda kelisimi de jańa múmkindikter ashady. Qujat 367-ge jýyq taýarǵa qatysty. Ol kúshine engennen keıin bul ónimderdi jetkizý jeńildeıdi. Sonyń arqasynda qazaqstandyq eksporttaýshylarǵa Mońǵolııa naryǵyna shyǵý ońaı bolady.
— Qazir kelisimdi kúshine engizý boıynsha jumys júrip jatyr. Jaqyn ýaqytta iske asady dep kútemiz. Bul otandyq kompanııalar úshin eksportty ulǵaıtyp, Mońǵolııamyn birlesken jobalardy iske qosýǵa jol ashady, — deıdi Aıjan Bıjanova.
Kelesi qadam — Qazaqstannyń tranzıt múmkindikterin paıdalaný. Bul Mońǵolııaǵa júk jetkizýdi jyldamdatyp, jańa baǵyttarǵa shyǵýǵa jol ashady. Sonyń ishinde EAEO, Kavkaz, Túrkııa jáne Eýropa naryqtary bar.
Saýda mıssııasy Mońǵolııa Prezıdenti Ýhnaagıın Hýrelsýhtyń Qazaqstanǵa sapary qarsańynda ótip jatyr.
Aıta ketelik Mońǵolııa naryǵyna Qazaqstan taýarlaryn eksporttaý jeńildegeni týraly jazǵan edik.