Qazaqstan men Moldova konsýldyq saladaǵy yntymaqtastyqty keńeıtedi
ASTANA. KAZINFORM — Konsýldyq máseleler boıynsha Qazaqstan Respýblıkasy men Moldova Respýblıkasynyń syrtqy ister mınıstrlikteri arasyndaǵy konsýltatsııalar ótti, dep habarlaıdy QR SІM baspasóz qyzmeti.
Qazaqstan delegatsııasyn Syrtqy ister mınıstrligi Konsýldyq qyzmet departamentiniń dırektory Azamat Aýbekov, Moldova tarapyn SІM Konsýldyq ister jónindegi bas basqarmasynyń basshysy Lılıan Morarý basqardy. Sonymen qatar kezdesýge eki memlekettiń quzyretti organdarynyń ókilderi qatysty.
Dıplomattar ózara is-qımyl deńgeıin joǵary baǵalap, senim men halyqaralyq quqyq normalaryn saqtaý qaǵıdattaryna negizdelgen yntymaqtastyqty odan ári nyǵaıtýǵa daıyn ekendikterin rastady.
— Kezdesý barysynda kóshi-qon saıasaty, shekaralardy basqarý, qujattardy ózara taný, konsýldyq qyzmetterdi tsıfrlandyrý, sondaı-aq halyqaralyq konventsııalarǵa sáıkes azamattarǵa quqyqtyq kómek kórsetý máseleleri talqylandy, — delingen habarlamada.
Qatysýshylar bul formattardyń mańyzdylyǵyna jáne olardyń ekijaqty qatynastardyń damyýyna úles qosatynyn atap ótti.
Kelissózder qorytyndysy boıynsha taraptar eki el azamattarynyń quqyqtary men múddelerin qorǵaý maqsatynda aqparat almasýǵa daıyn ekendikterin rastady.
Budan buryn Moldova TMD quramynan shyǵý týraly túpkilikti sheshim qabyldaǵanyn jazdyq.
