Qazaqstan men Mysyr Parlamentaralyq baılanystardy nyǵaıtýdy kózdep otyr
ALMATY. KAZINFORM – Májilis spıkeri Erlan Qoshanov Qazaqstanǵa resmı saparmen kelgen Mysyr Arab Respýblıkasy Parlamenti Senatynyń tóraǵasy Ábdelýahab Ábdelrazeqpen kezdesti, dep habarlaıdy QR Parlamenti Senatynyń baspasóz qyzmeti.
Taraptar ekijaqty yntymaqtastyqty arttyrý, sonyń ishinde parlamentaralyq baılanysty tereńdetý máselesin talqylady.
Erlan Qoshanov Qazaqstan men Mysyr arasyndaǵy dıplomatııalyq qarym-qatynastyń ornaǵanyna 30 jyl tolǵanyn atap ótti.
«Osy ýaqyt ishinde eki el arasynda tyǵyz yntymaqtastyq ornady. Bul eń áýeli bizdiń kóshbasshylarymyz – Qasym-Jomart Toqaev pen Ábdel Fattah As-Sısıdiń eren eńbeginiń arqasynda dep bilemin. Aldaǵy ýaqytta da eki el basshylarynyń áriptestikti kúsheıtýge baǵyttalǵan jumysyn biz Parlament deńgeıinde jalǵastyratyn bolamyz, – dedi Májilis tóraǵasy.
Palata spıkeri Qasym-Jomart Toqaevtyń bastamasymen elimizde júrgizilip jatqan aýqymdy saıası, ekonomıkalyq reformalar týraly aıtyp, Májilistiń zań shyǵarý qyzmetine toqtaldy.
Taraptar eki el depýtattary dostyq toptarynyń jumysyn jandandyrýǵa kelisti.
Osy oraıda Erlan Qoshanov zańnama salasynda tájirıbe almasyp, eki eldiń sharttyq-quqyqtyq bazasyn keńeıtýge, atap aıtqanda, Qazaqstan men Mysyr arasyndaǵy ustap berý, qylmystyq ister boıynsha ózara quqyqtyq kómek jáne sottalǵan adamdardy berý týraly sharttarǵa qol qoıýdyń mańyzdylyǵyna nazar aýdardy.
Óz kezeginde Ábdelýahab ÁbdelrazeqQazaqstanda júrgizilip jatqan saıası jáne ekonomıkalyq reformalardy tolyq qoldaıtynyn aıtty.
«Bizdiń maqsatymyz – eki el Parlamentteri arasyndaǵy yntymaqtastyqty nyǵaıtý. Sonymen qatar áleýmettik, ekonomıkalyq jáne saıası baılanystardy arttyrýdy kózdeımiz. Eki el kóshbasshylary da yqpaldastyqty odan ári kúsheıtýge nıetti. Búgin Qazaqstan Prezıdentimen kezdesý biz úshin zor mártebe boldy», – dedi Mysyr Senatynyń tóraǵasy Ábdelýahab Ábdelrazeq.
Otyrys barysynda taraptar saýda-ekonomıkalyq, kólik-tranzıt, týrızm salasy men mádenı-gýmanıtarlyq saladaǵy yntymaqtastyq máselelerin de talqylady.
Jıyn sońynda Erlan Qoshanov Mysyr Senaty tóraǵasynyń resmı sapary elder arasyndaǵy saıası dıalogty nyǵaıtyp, Parlamentaralyq yntymaqtastyqty odan ári damytýǵa tyń serpin beretinine senim bildirdi.
