Qazaqstan men Mysyr farmatsevtıka salasyndaǵy yntymaqtastyqty nyǵaıtpaq

ASTANA. KAZINFORM — Qazaqstan Respýblıkasynyń Mysyr Arab Respýblıkasyndaǵy Elshisi Asqar Jeńis «Egyptian International Pharmaceutical Industries Co.» (EIPICO) kompanııasynyń basshylyǵymen kezdesip, elimizde ınvestıtsııalyq jobany iske asyrý josparlaryn talqylady. Bul týraly SІM málim etti.

— «EIPICO» basqarma tóraǵasy Ahmed Kelanı Qazaqstanda zamanaýı tolyq tsıkldi farmatsevtıkalyq zaýyt salý jobasyn jalǵastyrýǵa daıyn ekenin rastady, — delingen vedomstvo habarlmasynda.

A.Kelanıdyń aıtýynsha, joba jańa kezeńge shyqty: kásiporyn ashylatyn alań anyqtaldy. Jaqyn ýaqytta kompanııa basshylyǵy Qazaqstanǵa kelip, jobany júzege asyrýdyń uıymdastyrýshylyq jáne tehnıkalyq máselelerin talqylaýdy josparlap otyr.

Óz kezeginde Elshi farmatsevtıkalyq ındýstrııany damytý men dárilik zattardyń jergilikti óndirisin keńeıtýdi ulttyq ekonomıkanyń strategııalyq basymdyqtarynyń biri retinde aıqyndalǵanyn atap ótip, qazaq tarapynyń kompanııaǵa jan-jaqty qoldaý kórsetýge daıyn ekenin málimdedi.

Vedomstvonyń dereginshe, «EIPICO» — Mysyrdaǵy farmatsevtıkalyq ónim eksportynyń jetekshi kompanııasy, ol eldiń jalpy farmatsevtıkalyq taýar eksportynyń shamamen 21 paıyzyn qamtamasyz etedi. Halyqaralyq ekspansııa strategııasy aıasynda kompanııa óndiristi jergilikti deńgeıde damytý úshin Qazaqstandy negizgi alańdardyń biri retinde tańdady.

Buǵan deıin habarlanǵandaı, Qazaqstan Slovenııanyń farmatsevtıka kompanııasymen birlesken kásiporyn qurýy múmkin.