Qazaqstan men Mysyr azamattar úshin vızalyq talaptardy jeńildetý máselesin talqylady
ASTANA. KAZINFORM – Qazaqstan men Mysyr eki el arasyndaǵy vızalyq talaptardy jeńildetý joldaryn talqylady. Bul týraly Syrtqy ister mınıstriniń orynbasary Arman Isaǵalıevtiń Mysyr Elshisi Sameh Shehatamen kezdesýinde belgili boldy.
Qazaqstan Respýblıkasy Syrtqy ister mınıstriniń orynbasary Arman Isaǵalıev Mysyr Arab Respýblıkasynyń Elshisi Sameh Shehatany qabyldady.
Kezdesý barysynda taraptar ekijaqty saıası, saýda-ekonomıkalyq, mádenı-gýmanıtarlyq jáne konsýldyq yntymaqtastyqtyń ózekti máselelerin qarastyrdy. Sonyń ishinde Qazaqstan azamattary úshin vızalyq talaptardy jeńildetý joldary sóz boldy.
Sonymen birge dıplomattar aldaǵy joǵary deńgeıdegi is-sharalarǵa daıyndyq barysyn talqylap, eki el arasyndaǵy quqyqtyq-sharttyq bazany keńeıtýge kelisti.
Osyǵan deıin qazaqstandyqtardyń qyzmettik pasportpen Eýropanyń úsh eline vızasyz bara alatyny týraly jazdyq.
