Qazaqstan men Mysyr arasynda áýe reısteri artady
ASTANA. KAZINFORM - Astana qalasynda Qazaqstan Respýblıkasy men Mysyr Arab Respýblıkasynyń avıatsııalyq bıligi arasynda ekijaqty kelissóz ótti.
Qazaqstandyq delegatsııany Qazaqstan Respýblıkasy Kólik mınıstrliginiń Azamattyq avıatsııa komıtetiniń tóraǵasy Saltanat Tompıeva, Mysyr tarapyn Mysyr avıatsııa mınıstrligi Avıatsııalyq ákimshiliginiń áýe kóligi jónindegi Memlekettik hatshysynyń orynbasary Hesham Abdel Baset myrza basqardy.
Kelissóz qorytyndysy boıynsha taraptar elder arasyndaǵy ruqsat etilgen reısterdiń jalpy sanyn aptasyna 14-ten 48-ge deıin, sondaı-aq árbir tarap úshin ruqsat etilgen tarmaqtardy 2-den 3-ke deıin ulǵaıtýǵa ýaǵdalasty.
Sondaı-aq, taǵaıyndalǵan tasymaldaýshylardyń sany artty.
Máselen, qazaqstandyq tarap qoldanystaǵy Air Astana jáne SCAT tasymaldaýshylaryna Fly Arystan áýe kompanııasyn elder arasyndaǵy turaqty reısterdi oryndaýǵa taǵaıyndady.
Mysyr tarapy óz kezeginde qoldanystaǵy EgyptAir, EgyprAir Cargo jáne Air Cairo tasymaldaýshylaryna Red Sea jáne Nile Air taǵaıyndady.
Sonymen birge, qol jetkizilgen kelisim boıynsha eki eldiń áýe kompanııalary ózara kommertsııalyq kelisimder jasaı alady.
Ýaǵdalastyq negizinde eki taraptyń taǵaıyndalǵan áýe kompanııalary reıster sanyn ulǵaıtýdy jáne elder arasyndaǵy ushý geografııasyn keńeıtýdi josparlap otyr.