Qazaqstan men Michigan State University akademııalyq yntymaqtastyqty keńeıtedi
ASTANA. KAZINFORM — «Halyqaralyq baǵdarlamalar ortalyǵy» AQ alańynda Michigan State University delegatsııasymen kezdesý ótip, taraptar akademııalyq jáne ǵylymı yntymaqtastyqty keńeıtýdiń negizgi baǵyttaryn talqylady.
Delegatsııa quramynda Titus Awokuse (ISP vıtse-provosty jáne dekany), Vlad Tarabara (Eýropa jáne Eýrazııa zertteýleri ortalyǵynyń dırektory), Amita Chudgar (Bilim berý kolledjiniń halyqaralyq bilim berý keńsesiniń qaýymdastyrylǵan dekany jáne dırektory), Yadu Pokhrel (Asia Hub dırektorynyń orynbasary) jáne Xinyu Wu (VIPP baǵdarlamasynyń dırektory) boldy. Qazaqstan tarapynan kezdesýge «Halyqaralyq baǵdarlamalar ortalyǵy» AQ basshylyǵy men qyzmetkerleri qatysty.
Kezdesý barysynda Basqarma tóraǵasy Adıl Kýsmanov Ortalyqtyń negizgi basymdyqtaryn atap ótip, ınjenerııa, medıtsına, STEM baǵyttary, jasandy ıntellekt jáne ıadrolyq energetıka salalaryna erekshe nazar aýdarylatynyn jetkizdi. Sondaı-aq «Bolashaq» baǵdarlamasy aıasyndaǵy sheteldik ýnıversıtetter tizimi pándik baǵyttar boıynsha qalyptasatyny jáne QS World University Rankings pándik reıtıngterinde top-100 qataryna kiretin joǵary oqý oryndary eskeriletini aıtyldy.
— Taraptar qazirgi akademııalyq yntymaqtastyq máselelerin, sonyń ishinde qazaqstandyq stýdentter men zertteýshilerdiń Michigan State Universitýbaǵdarlamalaryna qatysýyn talqylady. Málimetterge sáıkes, Qazaqstannan 100-ge jýyq ókil MSU-de 15 beıindik baǵyt boıynsha bilim alyp, ǵylymı daıarlyqtan ótken, — delingen «Halyqaralyq baǵdarlamalar ortalyǵy» AQ habarlamasynda.
Bul óz kezeginde turaqty akademııalyq baılanystardyń damýyna yqpal etýde. Michigan State University — halyqaralyq deńgeıde bedeldi, kópsalaly zertteý ýnıversıteti, akademııalyq jáne ǵylymı áleýeti joǵary oqý oryndarynyń biri. Sondaı-aq halyqaralyq reıtıngtik júıelerdi qoldaný tájirıbesi qarastyryldy.
Ýnıversıtet ókilderi QS, Times Higher Education jáne Shanghai Ranking júıeleriniń paıdalanylatynyn, alaıda sońǵy jyldary pándik reıtıngterdiń mańyzy artyp kele jatqanyn atap ótti. Kezdesý barysynda ýnıversıtettiń halyqaralyq áriptestikti óńirlik akademııalyq platformalar arqyly damytyp otyrǵany aıtyldy.
Bul turǵyda Ortalyq Azııa strategııalyq mańyzdy óńir retinde qarastyrylyp, Qazaqstan negizgi seriktes elderdiń biri ekeni erekshe ataldy. Taraptar ǵylymı yntymaqtastyqtyń turaqty damyp kele jatqanyn da atap ótti.
Sońǵy jyldary birlesken ǵylymı jarııalanymdar men jobalar júzege asyrylyp, halyqaralyq baǵdarlamalar túlekteri, sonyń ishinde «Bolashaq» stıpendıattary, ýnıversıtettiń ǵylymı jáne akademııalyq qyzmetine belsendi túrde qatysyp júr.
Kezdesý qorytyndysy boıynsha taraptar yntymaqtastyqty odan ári keńeıtýge, birlesken bilim berý jáne zertteý bastamalaryn damytýǵa, sondaı-aq akademııalyq almasýlardy kúsheıtýge ózara múddelilik bildirdi.
Aıta keteıik, Belarýs Respýblıkasynyń joǵary oqý oryndarynda bilim alýǵa qujat qabyldaý bastalady.
