Qazaqstan men Majarstan ózara taýar aınalymyn 1 mlrd dollarǵa jetkizbek

ASTANA. KAZINFORM — Qazaqstan men Majarstan energetıka, atom ónerkásibi, aýyl sharýashylyǵy sııaqty túrli baǵyttaǵy yqpaldastyqty arttyrýǵa ýaǵdalasty.

Bul týraly Aqordada elimizge resmı saparmen kelgen Majarstan Prezıdenti Tamash Shýıokpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.

— Jańa ǵana joǵary mártebeli Tamash Shýıok myrzamen keńeıtilgen quramda mazmundy kelissózder júrgizdik. Yqpaldastyǵymyzdy kúsheıtýdiń jańa baǵyttary týraly áńgimelestik. Saýda-ekonomıka salasyndaǵy baılanysymyzdy damyta túsý qajettigine basa nazar aýdardyq. Byltyr eki eldiń alys-beris 200 mln dollar shamasynda boldy. Keleshekte ony 1 mlrd dollarǵa deıin jetkizýdi kózdep otyrmyz. Majarstan sońǵy 20 jylda elimizdiń ekonomıkasyna 385 mln dollardan astam ınvestıtsııa saldy. Mol kompanııasy Qazaqstannyń gaz salasynda tabysty jumys istep jatyr. Kún tártibinde taǵy basqa aýqymdy jobalar bar, — dedi Prezıdent.

Memleket basshysy elimizde tabysty jumys istep jatqan ózge de majarlyq kompanııalar bar ekenin atap ótti.

— Qazirgi tańda 20 ortaq jobany júzege asyryp jatyrmyz. Yntymaqtastyǵymyz strategııalyq maǵynaǵa ıe boldy. Biz ınvestıtsııalyq qarym-qatynastarymyzdy odan ary keńeıtýge múddelimiz. Osy rette energetıka, atom ónerkásibi, aýyl sharýashylyǵy sııaqty túrli baǵyttaǵy yqpaldastyǵymyzdy arttyrýǵa ýaǵdalastyq. Sondaı-aq halyqaralyq kólik dálizderin, logıstıka ınfraqurylymyn damytýdyń mańyzdylyǵyn atap óttik, — dedi Qasym-Jomart Toqaev.

Aıta keteıik, Qasym-Jomart Toqaev majarlyq áriptesimen keńeıtilgen quramdaǵy kelissóz barysynda Qazaqstanda birlesken jobalardy iske asyrýǵa nıetti majarlyq kásipkerlerge tolyq qoldaý kórsetiletindigin aıtqan bolatyn.