Qazaqstan men Majarstan qylmystyq ister boıynsha ózara kómekter kórsetýge mindettelmek - Májilis
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasy men Majarstan arasyndaǵy qylmystyq ister boıynsha ózara quqyqtyq kómek týraly shartty ratıfıkatsııalaý týraly» zań jobasyn maquldady. Shartqa 2015 jyldyń 1 sáýirinde Astana qalasynda qol qoıylǵan.
Shart erejelerine sáıkes, Taraptardyń suraý salýlary negizinde quzyretti ádilet organdarynyń ıýrısdıktsııasyna jatatyn qylmystarǵa qatysty qylmystyq is júrgizýler boıynsha bir-birine ózara quqyqtyq kómekter kórsetýge mindetteledi. Bul rette Qazaqstan men Majarstan quqyqtyq kómekter aıasynda adamdardyń nemese zattardyń ornalasqan jerin anyqtaýdy jáne olardy sáıkestendirýdi, qylmystyq is júrgizýge qatysy bar qujattar men materıaldardy tabys etýdi qarastyrady. Budan bólek, memleketterdiń quzyretti organdary ózara jaýap alý men aıǵaqtar alýdy, kúzetpen ustalatyn adamdardyń aıǵaqtaryn alý nemese basqa da protsestik áreketterge qatysýy úshin olardy ýaqytsha berýdi, tintýdi júzege asyrýdy, dáleldemelerdi alyp qoıýdy, aktıvterdi tárkileýdi júzege asyra alady.
Bul rette quqyqtyq kómekter suraý salatyn taraptardyń ulttyq zańnamasyna sáıkes jazalanýǵa jatatyn qylmystar boıynsha qozǵalǵan ister boıynsha beriledi.
Májilis maquldaǵan zań jobasy Senatqa joldanady.
