Qazaqstan men Majarstan yntymaqtastyqtyń jańa kókjıekterin ashady
ASTANA. KAZINFORM – Osy aptada Býdapeshtte «Qazaqstan – Majarstan: saýda-ekonomıkalyq yntymaqtastyqtyń jańa úrdisteri» atty «dóńgelek ústel» ótti, dep habarlaıdy Kazinform tilshisi.
Іs-sharany Qazaqstannyń Majarstandaǵy Elshiligi «Kazakh Invest» kompanııasymen birlesip, HEPA (Majarstan eksportyn yntalandyrý agenttigi) jáne Majarstannyń ónerkásip jáne saýda palatasynyń qoldaýymen uıymdastyrdy.
«Kazakh Invest» ókildiginiń habarlaýynsha, is-sharaǵa 70-ten astam qatysýshy, onyń ishinde Qazaqstan men Majarstandan memlekettik organdardyń ókilderi, jetekshi kompanııalar men sarapshylar qatysqan.
Іs-shara Qazaqstan Respýblıkasynyń Prezıdenti Qasym-Jomart Toqaevtyń 2024 jylǵy 19-20 qarashadaǵy Majarstanǵa memlekettik saparynan keıin bastalǵan oń dınamıkanyń mańyzdy jalǵasy boldy.
Esterińizge sala keteıik, sapar barysynda aǵymdaǵy jyldyń 20 qarashasynda Memleket basshysy Majarstanlyq jetekshi kompanııalar basshylarynyń qatysýymen dóńgelek ústel ótkizgen bolatyn. Bıznes ókilderi Qazaqstan Respýblıkasynyń Prezıdentimen kezdesýdiń mańyzdylyǵyn, onyń tabysy men ekijaqty qarym-qatynastardy damytýǵa qosqan úlesin atap ótti.
Bul sharanyń basty maqsaty Qazaqstan men Majarstan arasyndaǵy iskerlik baılanysty nyǵaıtý, perspektıvalyq jobalardy talqylaý jáne yntymaqtastyqtyń jańa baǵyttaryn anyqtaý boldy.
Іs-shara barysynda ınfraqurylym men logıstıkany damytý, agrarlyq sektordaǵy birlesken jobalar, atom energetıkasy salasyndaǵy yntymaqtastyq, bilim berý men tsıfrlyq transformatsııadaǵy jańa múmkindikter jáne basqa da salalardaǵy negizgi máseleler talqylandy.
Spıkerler MOL Group, UBM Group, L.A.C. Holding, Elitmag, Alfaseed, MVM Group jáne I-Cell sekildi qazirdiń ózinde Qazaqstanmen ártúrli salalarda belsendi yntymaqtastyqta bolǵan Majarstan kompanııalarynyń tabysty qyzmetin erekshe atap ótti. Olardyń jobalary energetıka, logıstıka, aýyl sharýashylyǵy, tsıfrlyq transformatsııa jáne jańartylatyn energııany qamtıdy, bul elder arasyndaǵy tıimdi yntymaqtastyqtyń úlgisi bolyp tabylady.
Majarstandyq kompanııalar yntymaqtastyqty odan ári keńeıtýge, ınnovatsııalardy engizýge jáne Qazaqstanda birlesken óndiris oryndaryn qurýǵa daıyn ekendikterin bildirdi.
Sondaı-aq, eki eldiń bıznes ókilderi arasyndaǵy dıalogty nyǵaıtý eki jaqqa da tıimdi jobalardy júzege asyrýdyń jańa kókjıekterin ashatyny aıtyldy.
– Bizdiń elderimizdi kúshti ekonomıka men mádenıet baılanystyrady. Búgingi shara ózara yntymaqtastyqty nyǵaıtý, jańa ınvestıtsııalyq jobalardy qurý jáne strategııalyq seriktestikti damytý jolyndaǵy mańyzdy qadam boldy, – dedi Qazaqstannyń Majarstandaǵy Elshisi Abzal Saparbekuly.
Majarstan Ulttyq banki tóraǵasynyń orynbasary Kandraks Chaba Qazaqstan Majarstannyń Ortalyq Azııadaǵy eń belsendi jáne qundy seriktesteriniń birine aınalǵanyn atap ótti.
– Bizdiń tabysty yntymaqtastyǵymyz eki negizgi faktorǵa negizdelgen: ótkenge ortaq qurmet pen bolashaqqa degen birtutas nıet. Qazaqstan ınnovatsııalar, turaqty damý jáne qarjylyq tehnologııalar salasynda tańǵalarlyq deńgeıde alǵa jyljýda, bul bizdiń bolashaq seriktestigimiz úshin berik negiz bola alady, – dedi ol.